¿Tijneki ma nimitsiljui se tlamantli tlen amo aka kimati?... * Biblia techiljuia toTeotsij kiijtojtoya se “tlamantli tlen achtoui axaka kimatki”. Yon iluikaeuanij amo kimatiyayaj, yeka nojkia kinekiyayaj kimatisej nopa tlamantli. ¿Tijnekiskia tijmatis tlake eliyaya?...

Uejkajkia, Jehová kichijki nopa achtoui tlakatl uan nopa achtoui siuatl. Nopa tlakatl motokaxtik Adán uan nopa siuatl Eva, uan toTeotsij kinkajki ma itstokaj ipan se yejyektsi xochimili tlen motokaxtik Edén. Jehová kinekiyaya Adán uan Eva ininuaya ininkoneuaj ma kichiuakaj nochi Tlaltipaktli kej eltoya Xochimili Edén uan nochipa ma itstokaj nopaya. Maske toTeotsij ya nopa kinekiyaya, Adán uan Eva amo uelkej itstoyaj nochipa ipan nopa yejyektsi Xochimili. ¿Tijmati kenke?...

Pampa Adán uan Eva amo kineltokakej Jehová. Yeka ipan ni tonali tojuantij amo tiitstokej ipan se xochimili. Maske amo mochijtok tlen toTeotsij kinekiyaya, ya kiijtojtok kichiuas se yejyektsi xochimili ipan Tlaltipaktli uan kiampa nochi maseualmej uelis itstosej nochipa ika pakilistli. ¿Kenijkatsa kichiuas? Ni uejkajki amo aka kimatiyaya.

Kema Jesús ualajki ipan Tlaltipaktli, tlamachtiko tlen nopa tlamantli katli amo aka kimatiyaya. Kiijtok eliyaya nopa toTeotsij iTlanauatijkayo. Nojkia kiijtok kema timomaijtosej, moneki titlajtlanisej ma peua tekichiua nopa Tlanauatijkayotl. ¿Kenke? Pampa ika nopa Tlanauatijkayotl kichiuas se yejyektsi xochimili ipan Tlaltipaktli.

¿Tiyolpaki pampa tijmati tiitstosej ipan Xochimili?... Xikilnamikto, ipan Xochimili itstosej san katli kineltokaj toTeotsij. Biblia kiijtoua uejkajkia itstoyaj maseualmej katli kineltokakej Jehová. Ipan ni pilamochtsi tikitasej ajkia inijuantij eliyayaj uan kenijkatsa uelis tijchiuasej kej inijuantij. ¿Tijneki tijmatis ajkia inijuantij eliyayaj?...