Namni wanta dhoksaa taʼe sitti himee beekaa?— * Macaafni Qulqulluun, waaʼee “dhoksaa” addaa Waaqayyo biraa dhufe tokkoo ni dubbata. Dhoksaan kun dhoksaa kan jedhame namoonni waaʼeesaa kan hin beekne waan turaniifidha. Ergamoonni Waaqayyoollee waaʼee dhoksaa kanaa caalaatti beekuu ni barbaadu turan. Atoo dhoksaan kun maal akka taʼe beekuu barbaaddaa?—

Dur dur, Waaqayyo dhiiraafi dubartii jalqabaa uume. Maqaansaanii Addaamiifi Hewwaan jedhama. Waaqayyo bakka jireenyaa bareedaa Eeden jedhamu isaaniif kenne. Addaamiifi Hewwaan Waaqayyoof utuu ajajamaniiru taʼee, isaaniifi ijoolleensaanii guutummaa lafaa jannata gochuu dandaʼu turan. Kana malees, Jannata keessa barabaraaf jiraachuu dandaʼu turan. Haataʼu malee, Addaamiifi Hewwaan maal akka godhan ni yaadattaa?—

Addaamiifi Hewwaan Waaqayyoof ajajamuu didan; nuyi yeroo harʼaa jannata keessa kan hin jiraannes kanaafidha. Waaqayyo garuu, guutummaa lafaa akka bareechu, namni hundumtuu barabaraaf akka jiraatuufi gammachuu akka qabaatu dubbateera. Waaqayyo kana kan godhu akkamitti? Yeroo dheeraadhaaf namoonni kana hin beekan turan. Kun dhoksaa ture.

Yesus yeroo lafarra ture, waaʼee dhoksaa kanaa caalaatti namoota barsiiseera. Dhoksaan kun waaʼee Mootummaa Waaqayyoo akka taʼe isaanitti hime. Mootummaan kun akka dhufu akka kadhatanis isaan barsiiseera. Mootummichi lafa kana jannata bareedduu godha.

Dhoksaa kana beekuu keetti gammaddeettaa?— Jannata keessa kan jiraatan namoota Yihowaadhaaf ajajaman qofa akka taʼan hin irraanfatin. Macaafni Qulqulluun seenaa dhiirotaafi dubartoota Yihowaadhaaf ajajamanii baayʼee nutti hima. Waaʼee namoota kanaa barachuu ni barbaaddaa?— Isaan keessaa tokko tokko eenyufaa akka taʼaniifi akkamitti akkasaanii taʼuu akka dandeenyu haa ilaallu.