¿Ko ꞌaꞌamu atu ꞌā tuꞌu hoa i te meꞌe e tahi mo taꞌe kī ki te rua?... * I ruŋa i te Puka o te ꞌAtua e ai rō ꞌā e tahi ꞌaꞌamu taꞌe ꞌite e te rahi o te taŋata. Te ꞌaꞌamu nei he ꞌaꞌamu hopeꞌa o te nui⁠-⁠nui o te ai mai te ꞌAtua i oho mai ai. Mai muꞌa ꞌā nuꞌu taꞌe rahi te nuꞌu ꞌite o ruŋa i te ꞌaꞌamu nei. Te merahi takoꞌa ko haŋa era ꞌā mo ꞌite o ruŋa i nei ꞌaꞌamu. ¿Haŋa rō koe mo ꞌite o ruŋa i te ꞌaꞌamu nei?...

Rahi nō te matahiti a tuꞌa, te ꞌAtua i aŋa ai te taŋata e i te viꞌe raꞌe. ¿Ko ai te rāua ꞌīŋoa?... Ko Atamu koīa ko Eva. A rāua i te henua nehe⁠-⁠nehe e noho era, ko Edén toꞌona ꞌīŋoa. ¡Te Tau o nei kona! O te ꞌAtua i aŋa peira mo noho o rāua. Te haŋa o te ꞌAtua, mo aŋa e rāua koīa ko te rāua ŋā poki, te henua taꞌatoꞌa pahe kona tau e tahi, pē Edén ꞌā. Toꞌona haŋa he noho tahi i ruŋa i te henua tau nei mo ora mo oho rō ai, e ꞌina e ko mate. ꞌIna rā meꞌe kai tuꞌu peira, ¿O te aha?

O te ai kai haka roŋo a Atamu koīa ko Eva ki te ꞌAtua, oīra tātou e taꞌe noho nei i ruŋa i te henua nehe⁠-⁠nehe. No atu nei meꞌe, ko kī ꞌā e te ꞌAtua, nā he tano te mahana he riro haka ꞌou te henua he kona nehe⁠-⁠nehe e tahi. Taꞌatoꞌa taŋata ka noho era i ruŋa, he koa tahi e ꞌina e ko mate. ¿Pe hē ka aŋa ena nei meꞌe e te ꞌAtua? Mai muꞌa ꞌā ꞌina e tahi taŋata i ꞌite pe hē te ꞌAtua ka aŋa era nei meꞌe, o te ai kai haka ꞌite e te ꞌAtua i te haꞌauraꞌa o te ꞌaꞌamu nei.

I turu mai era Ietū ki ruŋa i te henua, he ata hāpī ki te taŋata o ruŋa i te ꞌaꞌamu nei. A Ietū i kī, te ariki o te ꞌAtua, he ariki te henua taꞌatoꞌa, e mo nei ariki e aŋa mo riro te henua pahe kona nehe⁠-⁠nehe e tahi. A Ietū i hāpī takoꞌa rō mo nonoꞌi tātou ki te ꞌAtua mo tuꞌu mai rā hora.

¿E haŋa rō koe mo noho i ruŋa i te henua tuꞌu pe nei?... E uꞌi o rehu rō, mo te taŋata haka roŋo ki te ꞌAtua nō, e noho i ruŋa i te henua nehe⁠-⁠nehe nei. Te Puka o te ꞌAtua he ꞌaꞌamu mai o ruŋa i te rahi o te taŋata e ŋā viꞌe i haka roŋo ki te ꞌAtua. I ruŋa i te puka iti⁠-⁠iti nei, he hāpī tātou ko ai a rāua e pe hē tātou ana riva mo tuꞌu pē rāua ꞌā. ¿Haŋa rō koe mo ꞌite ko ai a rāua?...