Вакерѓа ли туке некој несави бути со ваљани те гараве ла, хем те на вакере ла јавереске?— * Адаја бути тани тајна, соске јавера мануша на џанена ла. И Библија вакерела баши јекх важно тајна. Ој тани важно соске авела таро Девел. Чак о ангелија да мангле те џанен побутер баши адаја тајна. Мангеа ли ту да те џане ла?—

Англедер бут, бут берша, о Девел керѓа е прво мурше хем е прво џувља. Ленгере анава сине Адам хем Ева. О Девел мукхља лен те живинен ко јекх бут шужо тхан со викинела пе сине Еден. Те шунен сине о Адам хем и Ева е Девле, ола хем ленгере чхаве ка керен сине цели Пхув те овел рај сар о Еден. Ола шај сине те живинен ко рај засекогаш. Ама сетинеа ту ли со керге о Адам хем и Ева?—

О Адам хем и Ева на шунге е Девле, хем адалеске амен на живинаја ко рај. Ама о Девел вакерѓа кај ка керел цели Пхув рај, тогаш сарине ка живинен засекогаш хем ка овен радосна. Сар ка керел адава? Бут време о мануша на џанена сине, соске адава сине тајна.

Кеда ало о Исус ки Пхув, ов вакерѓа е манушенге побутер баши адаја тајна. Пхенѓа кај и тајна тани е Девлескоро Царство. О Исус сикавѓа е манушен те молинен пе те авел о Царство. Адава Царство ка керел и Пхув те овел бут шужо рај.

Радујнеа тут ли со џанеа акаја тајна?— Ма бистре, само окола со шунена е Јехова ка живинен ко рај. И Библија вакерела аменге башо бут мануша со шунена сине е Јехова. Мангеа ли те џане кој сине ола?— Ајде те дикха кој сине несаве лендар хем сар шај те ова сар ленде.