ASISIAET 1
Aiyeiyea Naisialamikinit Oni Ajenun
Elimokinitor ijo ice tunganan aiyeiyea?— * Kinera Ebaibuli nuikamunitos einer loitegelikina loenyaritai “aiyeiyea naelai.” Erai naelai naarai ebunit kanejai Edeke. Enyaritai aiyeiyea naarai mam itunga ajenete. Akotosi imalaikan da ajenun nuikamunitos nu. Ikoto ijo ajenun nuikamunitos aiyeiyea na?—
Anyoika bo iwomit ijo akotosi imalaikan ajenun?
Kolosek, abu Edeke kosub ekiliokit losodit ka aberu. Ikirioria kec kes araas Adam ka Keba. Abu Edeke kijaik kes ere loebus loenyaritai emanikor loka Eden. Korai Adam keda Keba orimaritos Edeke, ti kesi keda idwe kec itaraunitos akwap kere paradais kwape emanikor loka Eden. Ido da ti kesi ejaritos ikar kere kotoma paradais. Konye iitunit ijo nuapotu Adam keda Keba kiswamata?—
Apotu Adam keda Keba ipalikisi Edeke, ngun nges mam oni iboia kotoma paradais lolo. Konye abu Edeke kotema ebe ebuni nges aitaraun akwap kere naibus, kosodete itunga kere aijar ikar kere kiyalamasi. Eipone bo ani kiswama nges nu? Kotoma apak naepol, mam itunga ajenete. Arai aiyeiyea.
Nabunio Yesu toma akwap, abu kisisianak itunga nuipu nuikamunitos aiyeiyea na. Abu kotema ebe erai naikamunit Ajakanut naka Edeke. Abu Yesu kolimok itunga ailip Ajakanut ngin abunere. Ebuni aitaraun akwap kere paradais naibus.
Kiyalama ijo ajenun aiyeiyea na?— Kiitu ebe ngul bon luerimaritos Yawe kesi epote aiboi kotoma paradais. Elimokinit oni Ebaibuli awaragasia nuipu nuikamunitos ikiliok ka angor lu apotu korimasi Yawe. Ikoto ijo aisisia nuikamunitos kesi?— Aso aanyutu lukangai bo ice kotoma kesi ido esisiautu eipone loipedoria oni aputor kesi.
KOSIOM KOTOMA OBAIBULI KON
^ atu. 3 Kotoma awaragasia kanu, ibuni ijo aanyun ejenunet lo (—) akaulo nuka aingiseta ace. Erai na apak naijo apalar kosodi acamakin ikoku kon abongokin.
