Kumbi munthu munyaki wakukukambiyapu chisisi?— a Bayibolo likamba vakukwaskana ndi chisisi cho chidanika kuti chisisi chakupaturika. Nchakupaturika chifukwa chituliya kwaku Chiuta. Chidanika kuti chisisi chifukwa ŵanthu achiziŵanga cha. Chinanga mbangelu nawu akhumbanga kuziŵa vinandi vakukwaskana ndi chisisi chenichi. Kumbi nawi ukhumba kuchiziŵa chisisi chenichi?—

Kali ukongwa, Chiuta wangulenga ŵanthu ŵaŵi akwamba, munthurumi ndi munthukazi. Mazina ngawu ngenga Adamu ndi Eva. Chiuta wanguŵapaska muzi wakutowa wo wadanikanga kuti munda wa Edene. Asani Adamu ndi Eva anguvwiya Chiuta, yiwu ndi ŵana ŵawu atingi asambusengi charu chosi kuja paradayisu nge po wenge munda wa Edene. Ndipu atingi ajengi mu Paradayisu mwenuyu kwamuyaya. Kweni, kumbi ukumbuka vo Adamu ndi Eva anguchita?—

Adamu ndi Eva angumuvwiya cha Chiuta, ndichu chifukwa chaki te m’paradayisu cha mazuŵa nganu. Kweni Chiuta wakukamba kuti wapangengi charu chosi chapasi kuti chije so chakutowa ndipu munthu weyosi wazamuja ndi umoyu wamuyaya kweniso wazamukondwa. Kumbi wazamuchita wuli venivi? Kwa nyengu yitali, ŵanthu aziŵanga cha chifukwa chenga chisisi.

Yesu wati waza pacharu chapasi, wangusambiza ŵanthu vinthu vinandi vakukwaskana ndi chisisi chenichi. Iyu wangukamba kuti nchisisi chakukwaskana ndi Ufumu waku Chiuta. Yesu wangukambiya ŵanthu kuti arombengi kuti Ufumu wenuwu uzi. Ufumu wenuwu ndiwu wazamusambusa charu kuti chizije paradayisu wakutowa.

Kumbi wakondwa kuchiziŵa chisisi chenichi?— Kumbuka kuti ŵanthu ŵija wo avwiya Yehova ndiwu azamuja m’Paradayisu. Bayibolo lititikambiya nkhani zinandi zakukwaskana ndi anthurumi ndi anthukazi wo anguvwiya Yehova. Kumbi ungayanja kuŵaziŵa?— Tiyi tiwoni kuti ŵenga ayani ndipu tingachita wuli kuti tiyanani nawu.