Haroho omuntu weena ayali akugambireho ekintu eky’ensita?— * Baibuli ebaza ha “nsita” ey’embaganiza kuruga hali Ruhanga. N’eyetwa nsita habwokuba abantu bakaba batagimanyire. N’abamalaika baali nibagonza kumanya hali ensita enu. Wakugondeze kumanya ensita enu?—

Okubanza Ruhanga akahanga omusaija n’omukazi. Bayetwaga Adamu na Hawa. Ruhanga akabaha amaka amarungi agayetwaga orugonjo rwa Adeni. Kakuba Adamu na Hawa bayorobiire Ruhanga, bakusoboire hamu n’abaana baabu kufoora ensi yoona orugonjo orurungi, kandi bakurwikairemu ebiro byoona. Kyonka noijuka Adamu na Hawa eki bacwiremu kukora?—

Ensi tekyali rugonjo rurungi habwokuba Adamu na Hawa bakajeemera Ruhanga. Baitu Ruhanga akaraganiza ngu naija kusemeza ensi yoona nukwo abantu bagyegondezemu ebiro byoona. Kinu yakukikozere ata? Kumara akasumi, abantu bakaba batamanyire omulingo yakufoiremu ensi yoona orugonjo orurungi habwokuba ekaba eri nsita ye.

Baitu Yesu obu yaizire omu nsi, akeegesa abantu ebirukukwata hali ensita enu. Yesu akagambira abantu ngu ensita enu nubwo Bukama bwa Ruhanga. Kandi akeegesa abantu kusaba Obukama obu bwije. Nubwo burukwija kufoora ensi yoona orugonjo orurukuzooka kurungi.

Tikikusemiize kumanya ensita enu?— Ijuka ngu abo abarukworobera Yahwe nibo bonka abalikara omu Rugonjo orurungi. Omu Baibuli harumu enganikyo nyingi ez’abasaija n’abakazi abayorobeeraga Yahwe. Wakugondeze kubamanya?— Katurole abamu hali bo n’ebitusobora kubegeraho.