Neessi asi xuurabaa yooti erii?— a Geeshsha Maxaafay Xoossay odido issi dumma ‘xuuraabaa’ yootees. Asay abaa eribeenna gishshau, hegee xuura geetettiis. Kiitanchatikka he xuuraabaa eranau keehi koyidosona. He xuuray aybakko eranau koyay?—

Keehi daro wodiyaappe kase, Xoossay koyro bitaniyaanne koyro maccaasiyo medhiis. Bitaniyaa sunttay Addaama; qassi maccaasee sunttay Hewaano. Xoossay eta Edene giyo keehi loꞌꞌiya sohuwan wottiis. Addaameenne Hewaana Xoossau azazettiyaakko, etinne eta naati kumetta saꞌaa he loꞌꞌiya sohuwaadan gannate oottanaagaa shin attiis. Qassi eti Gannatiyan merinau deꞌana danddayoosona shin attiis. SHin Addaameenne Hewaana ay oottidaakko hassayay?—

Addaameenne Hewaana Xoossau azazettibookkona; ha wodiyan nuuni gannatiyan deꞌennay hegaassa. SHin Xoossay kumetta saꞌaa loꞌꞌiya soho oottanaagaanne ubba asay merinau ufayttidi deꞌanaagaa yootiis. I hegaadan waati oottanee? Keehi daro wodiyau, asay hegaa eribeenna. Hegee xuura gididi takkiis.

Yesuusi saꞌaa yiido wode, he xuuraabaa asaa loytti tamaarissiis. I he xuuray Xoossaa Kawotettaabaa gidiyoogaa yootiis. Asay he Kawotettay yaanaadan woossana mala Yesuusi yootiis. He Kawotettay saꞌay loꞌꞌiya gannate gidanaadan oottana.

He xuuraa eriyaakko ufayttikkii?— Yihoowau azazettiyaageetu xallay Gannatiyan deꞌanaagaa hassaya. Geeshsha Maxaafay Yihoowau azazettida daro attuma asatubaanne macca asatubaa yootees. Etabaa eranau koyikkii?— Etappe issoti issoti oonakko, qassi nuuni etaagaadan waanidi hanana danddayiyaakko ane beꞌoos.