Ñee nannuʼ xii nga ti secretu la?... * Ti secretu nga xiixa ni huaxiéʼ nanna binni. Biblia ruzeeteʼ ti secretu nabé risaca ne laani nga «secretu sagradu». Sagradu ni purtiʼ zeeda ni de Dios. Ne guirutiʼ ñanna ni dxiqué. Dede né ca ángel gucaláʼdxicaʼ ñánnacaʼ xi laani. Ñuulaʼdxuʼ ñannuʼ secretu riʼ la?...

Maʼ raca stálepeʼ iza bizáʼ Dios primé hombre ne primé gunaa. Tu lácabe yaʼ... Adán ne Eva. Laacabe gulézacabe ndaaniʼ jardín ni guyuu Edén. Nabé sicarú lugar bidii Dios laacabe para guibánicabe. Ni gucalaʼdxiʼ Dios nga ñuninécabe ca xiiñicabe guidubi naca Guidxilayú riʼ ti lugar nabé sicarú, casi jardín ni guyuu Edén. Ne gucalaʼdxiʼ Jiobá nibánicabe ndaaniʼ ti paraísu sin qué ñuu dxi ñáticabe. Peru qué ñaca diʼ ni zacá. Xiñee yaʼ.

Purtiʼ qué nuzuubaʼ Adán ne Eva stiidxaʼ Dios, nga runi cadi nabáninu ndaaniʼ ti paraísu yanna riʼ. Peru maʼ guníʼ Dios ziuu dxi zaca Guidxilayú riʼ ti paraísu. Guiráʼ binni zabani sin qué chuʼ dxi gatiʼ ne ziuucaʼ nayecheʼ. Ximodo chigúnibe ni maʼ guniʼbe ca yaʼ. Xadxipeʼ qué ñanna binni ni. ¡Guca ni ti secretu!

Peru chaahuiʼ chaahuiʼ gunna binni ni. Dxi beeda Jesús lu Guidxilayú bisiidiʼ binni xii nga secretu riʼ. Bisiénebe laacaʼ laani nga Reinu stiʼ Dios. Ora runi orarnu Dios rinábanu laa: «Biseendaʼ reinu stiluʼ». Xiñee yaʼ. Purtiʼ Reinu ca nga chiguni Guidxilayú riʼ ti paraísu sicarú.

Ñuulaʼdxuʼ nibanuʼ ndaaniʼ Paraísu ca la?... Cadi guiaandaʼ lii, ca binni si ni guzuubaʼ stiidxaʼ Dios nga zabani ndaaniʼ Paraísu ca. Biblia ruzeeteʼ historia stiʼ stale hombre ne gunaa ni bizuubaʼ stiidxaʼ Jiobá Dios. Lu folletu riʼ zazíʼdinu tu laacabe ne ximodo zanda chinándanu ejemplu stícabe. Ñuuláʼdxiluʼ ñunibiaʼluʼ laacabe la?...