He alakanyi ngu tiya: Hi zumba ka didhorapa di di dhanwako ku i Jeriko. Dona di ti maneka ka ditiko da Kanana. Vathu va kona va ti si dhundi Jehovha. Phela Rahabhi nene a ti zumba ka didhoropa donedo.

Mbimo yi Rahabhi i nga ti ngadi mwanana, a pfite ti Mosi a nga phwisisa tona mati ka Linene lo bhilivila ni kuhulukisa Vaisrayeli khe Egipta. A tshumete e pfa ti Jehovha a nga va vhunisa tona Vaisrayeli ti to ve xula valala vawe. Se konkuwa a pfite to Vaisrayeli va akile hafuhi ni Jeriko!

Ditshiku dimwani ni wusiku, majaha mambidi ma tsute Jeriko ngu kumbzwingamela me ya wona ti didhoropa di nga ti zumbisile tona. Ona ma dhanwa ku sinyengwani. Vona va hokile m’tini ka Rahabhi. Ene a to va gela ve bela nyumbani. Ka wusiku wonewo, mkoma wa Jeriko a pfite ti to ku ni sinyengwani m’tini ka Rahabhi. Se mkoma a to ruma majaha me ya ka Rahabhi. Ene a to sisa sinyengwani hathala, se e gela majaha aya ma nga rumwa ngu mkoma a txi khene: ‘Kha ditshuri, vavamnevo va tile hawa kwangu, kambe vona va tsute. Va londeteni ngu ku kuluveta mi na va mana!’ U pimisa ti to ngu kutxani Rahabhi a di sisile majaha ale?— Nguko ene a ti themba Jehovha ni ku a ti ti ziva to a na ninga Vaisrayeli ditiko da Kanana.

Na si si se huma nyumbani ka Rahabhi, sinyengwani si thembisile ku m’hulukisa ni maxaka akwe ku txi loviswa didhoropa da Jeriko. Wa ti ziva ti to si m’gete kumaha txani?— Si m’gete tiya: ‘Teka ngoti yiya yo bhilivila u yi hayeka ka dijanela ngu hahanze. U txo nga maha toneto, u na huluka ni maxaka ako ya ma no va nyumbani muwa.’ Rahabhi a mahile totshe ti a nga gelwa ngu sinyengwani. Se wa ti ziva ti ti nga gwita ti maheka?—

Msana ka masikunyana, Vaisrayeli va khatile ku tenderuka ngu kumbzwingamela dotshe didhoropa. Kudingana 6 wa masiku vona va ti tenderuka didhoropa kumweko ngu ditshiku. Kambe ngu ditshiku da wu 7, va tenderukile 7 wa makhambi. Se ve gwita ve kwangula.  Jehovha a mahile ti to yotshe mi muru ya didhoropa yi wa. Kambe ku to sala aha ku nga ti ni ngoti yo bhilivila! Wa yi wona ha ka mfota?— Rahabhi ni maxaka akwe va hulukile!

U nga gonda txani ka Rahabhi?— Rahabhi a ti themba Jehovha nguko a nga pfa timhaka to xamalisa ti a nga maha. Nawe u gondile ngu timhaka to xamalisa a ti Jehovha a nga maha. Ina nawe wa m’themba kufana ni Rahabhi?— Ngu ditshuri!