Fer krwar nou dan lavil Zeriko. Sa lavil i Kanaan e i en landrwa kot dimoun pa krwar dan Zeova. En madanm ki apel Raab i reste la.

Ler Raab ti ankor ptipti, i ti tann bann zistwar lo lafason ki Moiz ti separ Lanmer Rouz e tir bann Izraelit Lezip. I ti osi tande ki Zeova ti ed bann Izraelit pour ranport laviktwar ler zot ti lager avek zot lennmi. La aprezan i tande ki bann Izraelit pe kanpe o bor Zeriko.

Sa zour swar, de Izraelit i al Zeriko pour gete ki i annan dan sa lavil. Zot al kot lakaz Raab. Raab i envit zot anndan e dir zot reste. Pandan lannwit, lerwa Zeriko i tande ki sa de espyon i dan lavil e ki zot in al kot lakaz Raab. Alor, lerwa i anvoy bann dimoun rod sa de zonm. Me, Raab i kasyet sa de espyon anler lo trwa son lakaz akoz son twa i plat e i dir bann zonm ki lerwa in anvoye: ‘Sa bann espyon pa la, zot in fini kit lavil. Si zot ale la deswit, zot pou kapab zwenn zot!’ Ou konnen akoz Raab pe protez sa de espyon?— Akoz i krwar dan Zeova e i konnen ki Zeova pou donn bann Izraelit pei Kanaan.

Avan ki sa de espyon i kit lakaz Raab, zot promet ki li ek son fanmir pou ganny proteze ler lavil Zeriko i ganny detrir. Eski ou konnen ki zot demann Raab pour fer?— Zot dir li: ‘Pran sa lakord rouz e met li anpandan par lafnet. Si ou fer sa, tou dimoun ki dan ou lakaz pou ganny proteze.’ Raab i fer sa ki sa de zonm i dir li fer. Eski ou konnen ki arive apre?—

Detrwa zour pli tar, bann Izraelit i fer letour sa lavil an silans. Pour sis zour, zot mars otour lavil enn fwa par zour. Me son setyenm zour, zot fer letour lavil set fwa. Apre sa, zot kriye byen for. Zeova i fer miray otour sa lavil grennen. Me sa lakaz avek en lakord rouz anpandan par lafnet pa ti grennen! Eski ou kapab vwar li dan sa portre?— Raab ek son fanmir i sen e sof!

 Ki ou kapab aprann avek legzanp Raab?— Raab ti krwar dan Zeova akoz tou bann zoli keksoz ki i ti’n tande lo li. Ou osi ou pe aprann en kantite zoli keksoz lo Zeova. Eski ou krwar dan li parey Raab?— Nou konnen ou krwar dan li!