Ñaʼtancu chaʼan yaʼ añonla ti jiñi tejclum Jericó. Ili tejclum yaʼan ti Canaán, baqui jiñi wiñicob xʼixicob (quixtañujob) maʼañic miʼ ñopob Jehová. Yaʼ chumul juntiquil xʼixic mach bʌ lajalic bajcheʼ yambʌlob. I cʼabaʼ jiñʌch Rahab.

Cheʼ bʌ alʌ xchʼoc to jiñi Rahab, tsiʼ yubi chuqui tac melbil i chaʼan Jehová. Tiʼ ñaʼta bajcheʼ tsiʼ colta i tejclum Israel chaʼan miʼ mʌlben (jotben) i contrajob. Jumpʼejl ejemplo jiñʌch cheʼ Jehová tsiʼ cʼʌñʌ Moisés chaʼan miʼ locʼsan jiñi israelob ti Egipto. ¡Tsiʼ tʼoxo jiñi Chʌchʌc bʌ ñajb chaʼan miʼ mejlel ti cʼaxel i tejclum ti yambʌ junwejl! Pero wʌle Rahab tsaʼ ujti i yubin jumpʼejl tʼan: ¡Jiñi israelob lʌcʼʌlix añob ti Jericó yaʼ baqui chumul!

Jumpʼejl bʌ acʼʌlel, chaʼtiquil xyojchʼob tsaʼ ochiyob ti Jericó chaʼan miʼ mucu qʼuelob jiñi tejclum. Tsaʼ cʼotiyob ti yotot Rahab i tsiʼ subentiyob chaʼan miʼ cʌytʌlob. Ti jimbʌ acʼʌlel, jiñi rey ti Jericó tsaʼ cʼoti i yubin chaʼan tsaʼ ochi xyojchʼob yaʼ ti tejclum yicʼot chaʼan yaʼañob tiʼ yotot Rahab. Jin chaʼan, tsiʼ choco majlel i wiñicob chaʼan miʼ sʌclañob. ¿Chuqui tiʼ mele Rahab? Tsiʼ mucu jiñi xyojchʼob yaʼ tiʼ jol i yotot i tsiʼ sube i wiñicob jiñi rey: «Jiñi xyojchʼob tsaʼix majliyob. Pero mi ajñel mi laʼ majlel, muʼto mejlel laʼ tajob». ¡Cheʼʌch bajcheʼ jiñi, Rahab tsiʼ colta jiñi israelob! ¿A wom baʼ ñaʼtan chucoch tsiʼ coltayob?... Come tsaʼʌch i xucʼchoco i pusicʼal ti Jehová. Yujil chaʼan jiñʌch miʼ cajel i coltan israelob chaʼan miʼ chʼʌmob Jericó yicʼot jiñi lum ti Canaán.

Cheʼ muqʼuix caj i sujtelob jiñi xyojchʼob, tiʼ subeyob Rahab chaʼan mi caj i coltʌntel yicʼot i familia cheʼ bʌ Dios miʼ jisan jiñi tejclum. Pero Rahab añʌch chuqui yom miʼ mel chaʼan maʼañic miʼ tsʌnsʌntel. ¿Chuqui?... Jiñi xyojchʼob tiʼ subeyob: ‹Yom maʼ cʌch ili chʌchʌc lazo ti a ventana yicʼot maʼ tempan jiñi a piʼʌlob tiʼ mal a wotot›. Rahab cheʼʌch tsiʼ mele bajcheʼ tiʼ sube jiñi xyojchʼob. ¿A wom ba mic subeñet chuqui tsaʼ ujti ti wiʼil?...

Cheʼ bʌ tsaʼix ñumi chaʼpʼej uxpʼejl qʼuin, jiñi israelob tsiʼ joyojtayob jiñi tejclum Jericó. Ti 6 qʼuin ñʌchʼʌl tsiʼ joyojtayob jiñi tejclum, junyaj ti jujumpʼejl qʼuin. Pero tiʼ 7 qʼuinlel wucyajl tiʼ joyojtayob, cheʼ jiñi cʼam tsiʼ chaʼleyob oñel. ¡Jehová tsiʼ yʌcʼʌ ti yajlel jiñi colem tac bʌ i tsʼajquil Jericó! Pero ¿chuqui tiʼ  chaʼle i yotot Rahab? Maʼañic tsaʼ jejmi come tsiʼ jocʼ choco jiñi chʌchʌc bʌ lazo tiʼ ventana. ¿Muʼ baʼ taj a qʼuel jiñi lazo yaʼ ti dibujo?... ¡Cheʼʌch bajcheʼ jiñi, Rahab tsaʼ coltʌnti yicʼot i piʼʌlob!

¿Chucoch tsiʼ taja i coltʌntel Rahab?... Come tsiʼ jacʼbe i tʼan Jehová yicʼot tsiʼ xucʼchoco i pusicʼal tiʼ tojlel. Cheʼ bʌ tsaʼ subenti tiʼ pejtelel chuqui melbil bʌ i chaʼan Dios, tsaʼ caji i ñop Jehová. Jatet jaʼel cabʌl chuqui woli (yʌquel) a cʌn tiʼ tojlel Jehová. ¿Muʼ ba caj a jacʼben i tʼan Jehová cheʼ bajcheʼ tsiʼ mele Rahab?... ¡Mucʼʌch!