JOKWA 3
Rahab a ta a dube̱ Yehova
Muto̱ mō̱ a ta a ja o mundi mwa Yeriko, o ekombo a Kanaan, wuma bato ba si tano̱ ba bolea Yehova. Dina lao di ta nde ná Rahab.
Ponda Rahab a tano̱ son a mun’a muto, a sengi myango mi malangwe̱ ne̱ni Mose abino̱ Munja-mu-mole̱, na ne̱ni a die̱le̱no̱ bana ba Israel etum na Egipto. A sengi pe̱ ne̱ni Yehova ongwane̱no̱ babo̱ ná ba dipe basingedi babu o bila. Tatan, Rahab e o senga ná bana ba Israel be o mbasan ma Yeriko!
Rahab a wuti pe̱pi ońolona a ta a dube̱ Yehova
Bulu bō̱, bato baba ba Bonaisrael balo o jombwa mundi mwa Yeriko o diwuta. Bato ba mombwe̱ mundi mupe̱pe̱ o diwuta ba mabele̱ babo̱ ná pe̱pi. I pe̱pi yalo so̱ o ndabo a Rahab, na mo̱ inge̱le̱ babo̱ ná ba je oten. Bo bulu, kiṅ’a Yeriko e sengi ná pe̱pi iwo̱ i po̱i o mundi na ná ye o ndabo a Rahab. Na mo̱ a loma bato o damea babo̱. Rahab a wuti i pe̱pi ibane̱ omo̱ń a muńua mwa ndabo, a kwalane̱ bato ba kiṅe̱ ná: ‘Ba bato ba ta wan, nde ba mala. Lo poman te̱, lo me̱nde̱ damea babo̱!’ O bi ońola nje Rahab a wutino̱ i pe̱pi e?— Ońolana a ta a dube̱ Yehova, a ta pe̱ a bia ná Yehova a me̱nde̱ bola bana ba Israel ekombo a Kanaan.
Bianá i pe̱pi i masumwe̱ o ndabo a Rahab, i kakan mo̱ ná, mo̱ na mbia mao ba me̱nde̱ sungabe̱ ponda Yehova a me̱nde̱no̱ bule̱le̱ Yeriko. O bi nje ba langwedino̱ Rahab ná a bole e?— Bā ná: ‘No̱ngo̱ mun musinga mu mole̱, o kake mo̱ o wind’ango̱. O boli te̱ nika, bato be̱se̱ bena ba me̱nde̱ be̱ oteten a ndabo ango̱ ba me̱nde̱ sungabe̱.’ Rahab a boli ná te̱ite̱i nje pe̱pi i langwedino̱ mo̱. Ombusa nika, o bi nje e tombi e?—
Yehova a sungi Rahab, sango, ńango na bonańango
Ngus’a mińa mi tombino̱, bana ba Israel ba botedi o dangwa dinge̱le̱ mundi esibe̱ to̱po̱ to̱ lambo. Ba dango nika mińa mitoba, buńa te̱ ngedi po̱. Nde buńa bo londe̱ samba, ba dango dinge̱le̱ mundi ngedi samba. Na bana ba Israel be̱se̱ ba te̱ musea munde̱ne̱. ‘Wa nde Yehova a kwese̱no̱ bedima ba Yeriko. Ndabo a Rahab e ta e batame̱ n’edim’a mu mundi; nde to̱ na nika bedima be̱se̱ be kwedino̱, ndabo ao, ni ta ni be̱ne̱ musinga mu mole̱ o winda, e si kwedi tom! We o je̱ne̱ mo̱ o duta e?— Rahab, sango, ńango na bonańango ba sungabe̱!
Nje myango ma Rahab mi mokwe̱le̱no̱ wa e?— Rahab a ta a dube̱ Yehova ońola myango minde̱ne̱ a sengino̱ ná Yehova a boli. Wa pe̱ we o jokwa myango jombwea nje Yehova a mabolano̱. O dube̱ so̱ Yehova ka Rahab e?— Di bi ná o dube̱ mo̱!
