Mǐ ni ɖɔ ɖɔ mǐ ɖò toxo Jeliko tɔn mɛ. Toxo enɛ ɖò ayikúngban Kanáa tɔn jí. Mɛ e nɔ nɔ finɛ lɛ é ɖi nǔ nú Jehovah ǎ. Nyɔnu ɖé ɖò finɛ bo nɔ nyí Hlaxabu.

Hwenu e Hlaxabu ɖò ɖyɔvǐ mɛ é ɔ, é sè tan lee Mɔyizi má Xù Vɔvɔ ɔ bo kplá Izlayɛli-ví lɛ sín Ejipu gbɔn é tɔn. É lɛ́ sè lee Jehovah d’alɔ ye, bɔ ye ɖu ɖò ahwan e ye fun xá kɛntɔ́ yetɔn lɛ é jí gbɔn é. É sè dìn ɖɔ Izlayɛli-ví lɛ wá ɖó gɔnu ɖó Jeliko kpá!

Gbadanu gbè ɖokpo ɔ, Izlayɛli-ví we yì dò ba nú toxo Jeliko tɔn gbé. Ye wá Hlaxabu xwégbe, bɔ é yí ye dó xɔ tɔn mɛ. Zǎnmɛ ɔ, axɔ́su Jeliko tɔn sè ɖɔ dobanúnǔtɔ́ lɛ wá toxo ɔ mɛ bo ɖò Hlaxabu xwégbe. Enɛ wu ɔ, axɔ́su ɔ sɛ́ sunnu ɖé lɛ dó ɖɔ ye ni yì kplá ye wá. Hlaxabu hwlá dobanúnǔtɔ́ we lɛ dó xɔ tɔn sín azata, bo ɖɔ nú sunnu e axɔ́su ɔ sɛ́dó lɛ é ɖɔ: ‘Dobanúnǔtɔ́ lɛ wá fí nǔgbo, amɔ̌ ye ko tɔ́n sín toxo ɔ mɛ. Enyi mi jɛ gbě yetɔn mɛ dìn ɔ, mi sixu wlí ye!’ A ka tuùn nǔ e wu Hlaxabu hwlá dobanúnǔtɔ́ lɛ é à?— Ðó é ɖi nǔ nú Jehovah, bo tuùn ɖɔ é na na ayikúngban Kanáa tɔn ɔ Izlayɛli-ví lɛ.

Cobonu dobanúnǔtɔ́ lɛ na tɔ́n sín Hlaxabu xwégbe ɔ, ye d’akpá n’i ɖɔ é kpo mɛ tɔn lɛ kpo na gán hwenu e è na gbà Jeliko é. A ka tuùn nǔ e ye ɖɔ n’i ɖɔ é ni wà é à?— Ye ɖɔ: ‘Yǐ kan vɔvɔ elɔ, bo sin dó flɛtɛli towe nu. Enyi a wà mɔ̌ ɔ, mɛ e ɖò xwé towe gbè lɛ é bǐ na gán.’ Hlaxabu wà nǔ e dobanúnǔtɔ́ lɛ ɖɔ é ni wà é pɛ́pɛ́pɛ́. A ka tuùn nǔ e jɛ bɔ d’ewu é à?—

Azǎn yɔywɛ ɖé gudo ɔ, Izlayɛli-ví lɛ ɖi zɔnlin lɛlɛ̌ dó toxo ɔ, ye ɖě ka nɔ kɛnu ǎ. Azɔn ɖokpo gbè ɖokpo wɛ ye ɖi zɔnlin lɛlɛ̌ dó toxo ɔ na kaka nú azǎn ayizɛ́n. Amɔ̌, azǎn tɛnwegɔ́ ɔ gbè ɔ, ye ɖi zɔnlin lɛlɛ̌ dó toxo ɔ azɔn tɛnwe. Enɛ gudo ɔ, ye bǐ súxó tlílí. Jehovah bló bɔ ahohó e lɛlɛ̌ dó toxo ɔ é mu. Amɔ̌, xɔ e sín flɛtɛli nu è sin kan vɔvɔ ɔ dó é kɛɖɛ wɛ kpó ɖò te! A mɔ ɖò ɖiɖe ɔ mɛ à?— Hlaxabu kpo mɛ tɔn lɛ kpo gán!

 Etɛ tan Hlaxabu tɔn ka sixu kplɔ́n we?— Hlaxabu ɖi nǔ nú Jehovah, ɖó nǔjiwǔ e é sè ɖɔ É wà lɛ é wu. Hwi lɔ ɖò nǔ gegě kplɔ́n dó nǔjiwǔ Jehovah tɔn lɛ wu wɛ. A ka ɖi nǔ n’i Hlaxabu ɖɔhun à?— Mǐ tuùn ɖɔ a ɖi nǔ.