ZASEŊƆ 3
Arahab Yuun Tari Sakerɛ Mɛ Bɔ’ɔra Yehowa
Basɛ to makɛ yeti to boi la Yeriko teŋa. Yeriko wa bo la Kanaan teŋa poan, ti nɛreba la ka tara sakerɛ bɔ’ɔra Yehowa. Ti pɔka kayima yuun kɛ̃’ɛra bini ti a yu’urɛ dɛna Arahab.
Arahab n yuun de bia la, a tabelɛ wum ti Moses yelege Mɔgɔ Mɔlega ko’om la buyi ti Israeldoma ze’ele Egypt teŋa yakɛ. A me yuun le wum Yehowa n soŋɛ ba se’em ti ba zabɛ nyaŋɛ ba dinedoma. Nananawa a wum ti Israeldoma la nyaa tigese mɛ lɛm Yeriko teŋa!
Arahab yuun suɣɛ nɛreba la doose la eŋa n yuun tari sakerɛ bɔ’ɔra Yehowa la
Daarɛ deyima zaanɔɔrɛ ti Israeldoma buraasi bayi keŋɛ Yeriko teŋa ti ba ta kaɛ bisɛ. Ba yuun paɛ la Arahab zɛ’an. Ti a basɛ ti ba kɛ̃ a deo poan. Yinɛ n daa ta lui la, ti Yeriko Naba wum ti nɛreba n wa’ana ti ba kaɛ bisɛ teŋa la, bɔna Arahab zɛ’an. Ti naba la tum ti ba tari ba wa’ana. Arahab yuun suɣɛ ba mɛ gɔsegɔ zuo ge yele naba la n tum nɛresɛba la yeti: ‘Nɛreba bayi sirum wa’ana ge ba yese ya. Ya san tabegɛ ba poore nananawa, ya wan nyɔkɛ ba!’ Hon mi sɛla n sɔi ti Arahab suɣɛ nɛreba la n wa’ana ti ba kaɛ bisɛ la?— Eŋa n yuun tari sakerɛ bɔ’ɔra Yehowa ge mina ti a wan basɛ ti Israeldoma la zabɛ nyaŋɛ Kanaan teŋadoma la n sɔi.
Nɛreba la n yuun keese Arahab la, ba yuun yele en ti ba san yeti ba sa’am Yeriko ba wan faaɛ eŋa la a deodoma basɛ. Hon mi ba yele en ti a eŋɛ sɛla?— Ba yeti: ‘Dekɛ mi’a mɔlega wa yule ho takole nɔɔrɛ. Ho san dekɛ mi’a la yule nɛra woo wan nyɛ faarɛ ho deo wa poan.’ Arahab kɔ’ɔn eŋɛ la nɛreba la n yele en se’em la nɔɔ. Hon mi sɛla n eŋɛ pooren?—
Yehowa yuun faaɛ Arahab la a deodoma mɛ
Dabesa wani fii n tole, ti Israeldoma la keŋɛ kaɛ teŋa la baalam. Dabesa ayoobe ti ba keŋɛ kaɛ teŋa la, dabeserɛ woo poan sugumnɔɔrɛ buyina. Ge dabesa ayopɔi daarɛ la, ba kaɛ la sugumnɔɔrɛ buyopɔi. Ge ti ba za’a nyaa sakɛ kekeko basɛ sa. Ti Yehowa basɛ ti teŋa la gbirege lui. Ge ti deo seko ti mi’a mɔlega yula la ma’a kelum zea! Hon nyɛ mi’a la foote la poan?— Arahab la a deodoma ma’a n pĩɛ!
Hon zamesɛ la bem yese Arahab zɛ’an?— Arahab yuun tari sakerɛ mɛ bɔ’ɔra Yehowa doose la eŋa n yuun wum a tuunkirisi tuuma se’em la. Hon me zameseri la Yehowa tuunkirisi tuuma la. Hon tari sakerɛ bɔ’ɔra en wuu Arahab?— To mi ti ho tari!
