Yindula nde beto kele na mbanza Yeriko. Mbanza yango kele na Kanana, insi yina bantu vandaka ve kukwikila na Yehowa. Nkento mosi na zina ya Rahabi vandaka kuzinga kuna.

Ntangu Rahabi vandaka leke, yandi waka masolo ya ke tubila mutindu Moize kabulaka Nzadi-Mungwa ya Mbwaki mpi basisaka bantu ya Izraele na Ezipte. Yandi waka mpi mutindu Yehowa sadisaka bo na kununga bambeni na bo. Ntangu yai, yandi me wa nde bantu ya Izraele me tunga kan na bo pene-pene ya Yeriko!

Kilumbu mosi na nkokila, mineki zole ya Izraele kotaka na Yeriko sambu na kutala mbanza. Bo kumaka na nzo ya Rahabi. Yandi bingaka bo na kukota na nzo mpi na kuvanda. Na mpimpa, bantu zabisaka ntotila ya Yeriko nde mineki me kota na mbanza mpi bo kele na nzo ya Rahabi. Ntotila tindaka bantu na kukwenda kukanga bo. Kansi, Rahabi bumbaka mineki yina zole na ludi ya papala ya nzo na yandi mpi zabisaka bantu ya ntotila nde: ‘Mineki vandaka awa, kansi bo me basika dezia. Kana beno landa bo ntangu yai, beno lenda kanga bo!’ Nge me zaba sambu na nki Rahabi bumbaka mineki yina?— Sambu yandi vandaka kukwikila na Yehowa mpi zabaka nde yandi ta pesa bantu ya Izraele insi ya Kanana.

Na ntwala nde mineki kubasika na nzo ya Rahabi, bo silaka Rahabi nde yandi ti dibuta na yandi ta guluka ntangu Yeriko ta fwa. Nge me zaba diambu yina bo songaka yandi na kusala?— Bo tubaka nde: ‘Baka nsinga yai ya mbwaki, mpi kangisa yo na nganda ya nela na nge. Kana nge sala mpidina, muntu yonso yina ta vanda na nzo na nge ta guluka.’ Rahabi salaka kaka mutindu mineki zabisaka yandi. Nge me zaba mambu yina salamaka na nima?—

Bilumbu fioti na nima, bantu ya Izraele tambulaka na nziunga ya mbanza yina kukonda makelele. Bo salaka mutindu yina bilumbu sambanu; bo vandaka kutambula na nziunga ya mbanza mbala mosi konso kilumbu. Kansi na kilumbu ya nsambwadi, bo tambulaka na nziunga ya mbanza mbala nsambwadi. Mpi na nima, bo yonso tulaka milolo ya ngolo. Yehowa bwisaka bibaka ya mbanza Yeriko. Kansi, nzo yina vandaka  ti nsinga ya mbwaki ya kukangisa na nela bwaka ve! Keti nge ke mona yo na kifwanisu?— Rahabi ti dibuta na yandi gulukaka!

Inki dilongi nge lenda baka na disolo ya Rahabi?— Rahabi kwikilaka na Yehowa sambu na mambu yonso ya nene yina yandi longukaka na yina me tala Yehowa. Nge mpi ke longuka mambu mingi ya me tala Yehowa. Keti nge ke kwikilaka na Yehowa bonso Rahabi?— Beto me zaba nde nge ke kwikilaka na yandi!