Lɛ wi se wi de na wan tɔŋ we dɛn kɔl Jɛriko. Na insay Kenan dis tɔŋ bin de, ɛn Kenan na bin ples usay pipul dɛn nɔ bin biliv Jiova. Na insay dis tɔŋ ya wan uman bin de we nem Reab.

We Reab bin smɔl, i bin yɛri bɔt aw Mozis sheb di Rɛd Si tu pat ɛn pul di Izrɛlayt dɛn na Ijipt. I bin yɛri bak bɔt aw Jiova bin ɛp dɛn fɔ win di wɔ dɛn we dɛn bin de fɛt dɛn ɛnimi dɛn. Naw, i dɔn yɛri se di Izrɛlayt dɛn dɔn kam de nia Jɛriko.

Wan ivintɛm, tu Izrɛlayt man dɛn go na Jɛriko fɔ go wach aw di tɔŋ tan lɛk. Dɛn kam na Reab in os. Ɛn Reab tɛl dɛn fɔ kam insay in os ɛn de de. We nɛt rich, di kiŋ na Jɛriko kam no se sɔm pipul dɛn dɔn kam fɔ wach aw di tɔŋ tan lɛk, ɛn dɛn pipul ya dɔn go na Reab in os. So di kiŋ sɛn sɔm man dɛn fɔ go ol dɛn. Bɔt Reab ayd di man dɛn na di flat ruf we de na in os ɛn tɛl di kiŋ in man dɛn se: ‘Di man dɛn bin rili kam naya, bɔt dɛn dɔn go. If una go naw, una go ebul fɔ kech dɛn!’ Yu no wetin mek Reab ayd di man dɛn we kam wach aw Jɛriko tan?— Na bikɔs i bin biliv Jiova, ɛn i bin no se Jiova go gi Kenan to di Izrɛlayt dɛn.

Bifo di man dɛn we go wach aw Jɛriko tan, kɔmɔt na Reab in os, dɛn prɔmis am se natin nɔ go du in ɛn in famili we dɛn go kam fɛt Jɛriko. Yu no wetin dɛn tɛl am fɔ du?— Dɛn tɛl am se: ‘Tek dis rɛd rop, ɛn ɛng am na yu winda. We yu du dat, ɔlman we de insay yu os go sev.’ Reab bin du wetin dɛn man ya bin tɛl am fɔ du. Yu no wetin apin afta dat?—

Afta sɔm dez, di Izrɛlayt dɛn mach rawnd di tɔŋ. Dɛn nɔ bin de tɔk natin we dɛn de mach. Dɛn mach rawnd di tɔŋ fɔ siks dez, wan tɛm fɔ de. Bɔt we di de we mek sɛvin rich, dɛn mach rawnd di tɔŋ sɛvin tɛm. Dɔn dɛn ɔl ala lawd lawd wan. Ɛn Jiova mek di wɔl we de rawnd di tɔŋ fɔdɔm. Bɔt di os we gɛt di rɛd rop na di winda, nɔ bin fɔdɔm, i bin stil tinap! Yu de si am na di pikchɔ?— Reab ɛn in famili bin sev!

 Us lɛsin yu lan frɔm wetin Reab du?— Reab bin biliv Jiova bikɔs i bin dɔn no bɔt ɔl di fayn fayn tin dɛn we Jiova dɔn du. Yusɛf de lan bɔku fayn fayn tin dɛn bɔt Jiova. Yu biliv Jiova lɛk aw Reab bin biliv am?— Wi no se yu biliv am!