LONGI 3
Rakabi Wakwikila Muna Yave
Yindula vo mu mbanz’a Yeriko twina. E mbanza yayi ku nsi a Kenani ina. Esi Kenani ke bekwikilanga mu Yave ko. Nkento mosi una ye nkumbu a Rakabi ozingilanga mo.
Vava kakala dumbelele, Rakabi wawá tusansu mu kuma kia mpila ina Mose kavambulwila Mbu Ambwaki yo vaikisa Aneyisaele muna Engipito. Wawá mpe una Yave kabasadisila mu sunda e vita banwana ye atantu au. Owau owidi vo Aneyisaele lukufi bena ye Yeriko.
Rakabi watanina alangi kadi wakwikilanga muna Yave
Lumbu kimosi muna fuku, Aneyisaele wole bayenda kuna Yeriko mu langa e mbanza. Bayenda kuna nzo a Rakabi. Rakabi wabakotesa muna nzo yo kubalomba vo baleka muna nzo andi. Muna fuku, o ntinu a Yeriko wawá vo alangi bakotele mu mbanza ye kuna nzo a Rakabi bena. Muna kuma kiaki, o ntinu watuma wantu benda kubabaka. Rakabi wasweka alangi kuna nludi a nzo andi yo vovesa wantu ana katuma o ntinu vo: ‘Alangi i vava bakedi, kansi bavaikidi kala mu mbanza. Avo nubalende o wau, nulenda kubabaka.’ Nga ozeye ekuma Rakabi kaswekela alangi?— Ekuma kadi wakwikila muna Yave ye wazaya wo vo Yave ovana e nsi a Kenani kwa Aneyisaele.
Vitila alangi bavaika muna nzo a Rakabi, bansia nsilu vo yandi y’esi nzo andi bevuluzwa vava Yeriko ifwaswa. Nga ozeye dina bamvovesa vo kavanga?— Bavova vo: ‘Baka nsinga wau wambwaki wakanga wo muna zianela. Avo ovangidi wo, awonso bekala muna nzo aku bevuluzwa.’ Rakabi wavanga kikilu dina kavoveswa kw’alangi. Nga ozeye dina diavangama kuna kwalanda?—
Yave wavuluza Rakabi y’esi nzo andi
Ke vavioka lumbu yayingi ko, Aneyisaele bazieta e mbanza lembi vova diambu. Muna lumbu sambanu, bazieta e mbanza nkumbu mosi muna lumbu. Kansi, muna lumbu kia nsambwadi bazieta yo nkumbu nsambwadi. I bosi, yau awonso baboka mu nding’angolo. Yave wafwasa e yaka ya mbanza. Kansi, e nzo ina yakala ye nsinga wambwaki, ke yafwaswa ko. Nga omwene yo muna fwaniswa?— Rakabi y’esi nzo andi bavuluzwa.
Adieyi olenda longoka muna lusansu lwa Rakabi?— Rakabi wakwikila muna Yave mu kuma kia mambu mawonso masivi kawá mu kuma kiandi. Ongeye mpe mambu mayingi masivi olongokanga mu kuma kia Yave. Nga okwikilanga muna Yave nze una Rakabi kavanga?— Tuzeye wo vo ovanganga wo.
