IMBATA 3
Rahabu ’Ba Ndra Asi Ini Yehova ma Dria
Ama ma ’baki nga ecetasi ama aku ambo Yeriko niri ma alea. Aku ambo ’diri angu Kanani ni ’ba alenia ’diyi ni Yehova ni inzizu ku ria. Oku omvele Rahabu i ri ni o’a ’dia.
Rahabu ni ndra nga ovuzu zamva ru ria, eri ndra e’yo geri Musa ni Miri Ekari ma ale awazu iri ri ma dria geri erini anzi Israelini ’diyi ofuzu angu Misiria risi ri be. Eri vini ndra geri Yehova ni eyi ma azakozu ari’ba eyini ndu ndu ’diyi ndezu ri ma e’yo indi. Sawa ’disi eri di vini kini anzi Israelini ’diyi aso hema Yeriko ma ageyia enyia!
Rahabu mba ’ba ndindia azi ngapi ’diyi ma ta a’dusikuni ’ba asi ini Yehova ma dria
Ondre azini alu, anzi Israelini ’diyi ma azi iri ni nga mu Yerikoa azi ndindia ni ngazu aku ambo ’di ma alea. Ngaki ca Rahabu vule akua. Nga eyi omve joa dika fe yini lazu ’daa. Inisi, opi Yeriko niri nga oni kini ’ba azi ndindia ni ngapi ’diyi aku ambo ma alea dika muki Rahabu vule akua. Coti opi nga ’ba ma ti pe eyi bizu. Rahabu nga agupi iri ’diyi zi jo ma dria ’bua dika lu ’ba opi ni ti epele ’diyi ni kini: ‘’Ba azi ndindia ni ngapi ’diyi ta ’dia, te fuki aku ambo ma alea risi ’bo. Emi kaki mu mbele mbele, emi nga eyi isu geria!’ Mi ni asisile Rahabu ni ’ba azi ndindia ni ngapi ’diyi ma ta mbazu ri ra ya?— Asisile ni ri ’ba asi ini Yehova ma dria dika ni ra kini eri nga angu Kanani niri fe anzi Israelini dri ra.
De nga agupi iri ’diyi fukini Rahabu vule akua risi ku, soki oyo ngazu eri ma dri jazu ’ba eri vule akua ’diyi pie sawa Yeriko ma dri jazu risi ku. Mi ni luki erini ma ’ye a’du afa ni’ari ra ya?— ’Yoki ’dini: ‘Mi ’du baka ekaru ’di, mi ombe derisaa. Mi ka ’ye ’dini, ’ba dria mi vule joa ’diyi nga yi pa ra.’ Rahabu nga e’yo ’ye trotro ’ba azi ndindia ni ngapi ’diyi ni lu erini rile. Mi ni a’du ma e’yo ’ye i ’di ma vutia ni’ari ra ya?—
Yehova nga Rahabu ni pa ’ba eri vule akua ’diyi pie
O’du were ma vutia, anzi Israelini ngaki aci aku ’ma ageyi si kuru. Ngaki aci aku ambo nde ma ageyi si kuru o’du dria pale azia. Te o’du aziri risi, ngaki aci aku ambo nde ma ageyi si kuru pale aziri. Vutinia ngaki otre o’duko urusi. Yehova nga fe jo dria aku ambo ma alea ’diyi onyo yi vaa. Te jo baka ekaru be derisaa ri nyoni i ku! Mi eco eri ne i’da ma alea ’dia ra ya?— Rahabu pi ’ba erivule akua ’diyi pie paki eyi ra!
E’yo mini eco oni Rahabu vu ri ngoni?— Rahabu ’ba asi ini ri Yehova ma dria erini e’yo okporu Yehova ni ’yele ’diyi onizu risi. Sawa ’disi mi vini e’yo okporu ’diyi oni Yehova ma dria. Mi ’ba asi mini eri ma dria Rahabu driri le ra ya?— Aniki ra mi ’ba ra!
