FAKAAKOAGA 3
Tua a Raava ki a Iehova
Manamanatu la ko tautolu ha he maaga ko Ieriko. Haia e maaga nei he motu ko Kanana, ne nonofo ai e tau tagata ne nakai talitonu ki a Iehova. Ne nofo e fifine ko Raava he motu ia.
He magaaho ne tama tote a Raava, ne logona e ia e tau tala hagaao ki a Mose ne veveheua e Tahi Kula mo e takitaki kehe mai e tau Isaraela i Aikupito. Logona foki e ia hagaao ki a Iehova ne lagomatai a lautolu ke kautū ke he tau tauaga ha lautolu mo e tau fī. Ti logona e ia mogonei kua heapi e tau Isaraela tata ki Ieriko!
Puipui e Raava e tau tagata toko ha kua tua a ia ki a Iehova
He taha afiafi, ne tokoua e tagata Isaraela ne o atu ki Ieriko ke toko e maaga. Ne o atu a laua ke he fale ha Raava. Ti uiina e ia a laua ki fale mo e ke nonofo ai. He taha magaaho he pō, ne iloa he patuiki ha Ieriko kua fai tagata toko he maaga ti kua o atu ai ke he fale ha Raava. Ti fekau he patuiki e tau tagata taane ke o atu ke tamai a laua. Ne fufū e Raava e tau tagata toko he tua fale haana ti tala age ke he tau tagata he patuiki: ‘Ne o mai e tau tagata toko ki hinei, ka kua fitā he o kehe mai he maaga. Ka tutuli atu e mutolu mogonei, liga moua atu e mutolu a laua!’ Iloa nakai e koe e kakano ne puipui e Raava e tau tagata toko?— Kakano kua tua a ia ki a Iehova mo e iloa to foaki age e ia e motu ha Kanana ke he tau Isaraela.
Ato toka he tau tagata toko e fale ha Raava, ne mavehe a laua to fakahao a ia mo e magafaoa haana he magaaho ka moumou a Ieriko. Iloa nakai e koe e mena ne tala age e laua ki a Raava ke taute?— Pehē a laua: ‘Uta e toua kula nei, ti tautau he fakamaama haau. Ka taute pihia e koe, to fakahao e tau tagata oti i loto he fale haau.’ Ne taute pihia ni e Raava tuga ne tala age he tau toko ki a ia. Iloa nakai e koe e taha mena foki ne tupu?—
Fakahao e Iehova a Raava mo e magafaoa haana
Fai aho he mole, ne takai viko e tau Isaraela he maaga mo e nakai logona ha leo. Ne ono e aho ne takai viko a lautolu he maaga, lagataha he taha e aho. Ka ko e aho ke fituaki, ne laga fitu e takai viko ha lautolu he maaga. Ti kalaga fakaleo lahi a lautolu oti. Ne fakamalolo hifo e Iehova e tau kaupā he maaga. Ka ko e fale ne tautau e toua kula he fakamaama, ne tu agaia ni! Kitia nakai e koe i loto he fakatino?— Kua hao mooli a Raava mo e magafaoa haana!
Ko e heigoa haau ne fakaako mai ia Raava?— Ne tua a Raava ki a Iehova ha ko e tau mena ofoofogia oti ne iloa e ia hagaao ki a Iehova. Hane fakaako foki a koe ke he tau mena ofoofogia loga hagaao ki a Iehova. Tua nakai a koe ki a Ia tuga a Raava?— Iloa e mautolu kua tua a koe!
