THUTO 3
Rahaba o Ile a ba le Tumelo go Jehofa
A re fo re re be re dula motseng wa Jeriko. Motse wo o be o le nageng ya Kanana, moo batho ba gona ba bego ba sa dumele go Jehofa. Mosadi yo a bitšwago Rahaba o be a dula moo.
Ge Rahaba e be e sa le yo monyenyane, o ile a kwa ditaba tše dintši tša kamoo Moshe a ilego a aroganya meetse a Lewatleng le Lehwibidu gomme a ntšha Baisiraele Egipita. O ile a kwa le kamoo Jehofa a ilego a thuša Baisiraele go fenya manaba a bona dintweng. Ga bjale o kwa gore Baisiraele ba hlomile mešaša kgauswi le Jeriko!
Rahaba o ile a šireletša banna bao ba bego ba tlile go hlola naga ka gobane o be a na le tumelo go Jehofa
Bošegong bjo bongwe, Baisiraele ba babedi ba ile ba tla go hlola motse wa Jeriko. Ba ile ba tla ntlong ya Rahaba. O ile a ba amogela. Gare ga bošego, kgoši ya Jeriko e ile ya kwa gore go na le banna bao ba tlilego go hlola naga mo motseng le gore ba ile ntlong ya Rahaba. Ka gona kgoši e ile ya romela banna gore ba yo ba swara. Rahaba o ile a ba uta ka godimo ga ntlo ya gagwe gomme a botša banna ba kgoši gore: ‘Banna bao ba tlilego go hlola naga ba be ba le mo, eupša ba šetše ba tlogile. Ge le ka ba kitimiša, le tla ba swara!’ Na o a tseba gore ke ka baka la eng Rahaba a ile a šireletša banna bao ba Baisiraele?— Ke ka gobane o be a na le tumelo go Jehofa gomme a tseba gore Jehofa o tla nea Baisiraele naga ya Kanana.
Pele ga ge banna bao ba bego ba tlile go hlola naga ya Jeriko ba ka tloga ntlong ya Rahaba, ba ile ba mo holofetša gore yena le ba gabo ba be ba tla phologa ge Jeriko e fedišwa. Na o a tseba gore ba ile ba mmotša gore a dire eng?— Ba ile ba re: ‘Tšea thapo e khwibidu o e tlemelele lefasetereng la ntlo ya gago. Ge o ka dira bjalo, motho yo mongwe le yo mongwe yo a tlago go ba a le ka ntlong ye o tla phologa.’ Rahaba o ile a dira seo banna bao ba mmoditšego sona. Na o a tseba gore go ile gwa direga eng ka morago ga moo?—
Jehofa o ile a phološa Rahaba le ba gabo
Ka morago ga matšatši a sego kae, Baisiraele ba ile ba tla motseng wa Jeriko gomme ba o dikologa ba homotše. Ba ile ba o dikologa ka matšatši a tshelelago, ba dira bjalo gatee ka letšatši. Eupša ka letšatši la bošupa, ba ile ba o dikologa gašupa. Ke moka ba ile ba goeletša ka moka ga bona. Jehofa o ile a dira gore merako ya motse e we. Eupša ntlo yeo e bego e na le thapo e khwibidu lefasetereng e ile ya se we. Na o a e bona mo seswantšhong?— Rahaba le ba gabo ba ile ba phologa!
O ka ithuta eng go Rahaba?— Rahaba o be a na le tumelo go Jehofa ka baka la dilo ka moka tše dibotse tšeo a ithutilego tšona ka yena. Le wena o ithuta dilo tše dintši tše dibotse ka Jehofa. Na le wena o na le tumelo go yena go swana le Rahaba?— Re a tseba gore o na le yona!
