Doo i sere loo doodoo bee i le gbɛnɛbuɛ̄ Jɛriko. Buɛ̄ ama le barasī Kenan, e pya lo buɛ̄ naa wee taāŋaba Jɛhova. Ziī wa a kura Rehab tɔɔ̄ buɛ̄ ama.

Sɔ̄ Rehab bee le nwiīemuā, a bee dā eloh kere akiiloo kɛ̄ Mozis bee poo Miimii Pɛnɛ sa zaāsī pya Izrɛl aā Ijipt doo. A bee danage kɛ̄ Jɛhova bee wa yerebah nɛ̄ loe eeba pya wa nɛɛ̄ baa bu nɔ̄ doo. Nyawo, Rehab dā Kɔ pya Izrɛl e bɔ̄ŋanā kpaɛ̄ Jɛriko!

Ziī loo uunɛ, baɛ pya Izrɛl bee si Jɛriko wee gɔā e’ɛp lo buɛ̄. Ba lu ina tɔ Rehab. A kue wa nyima ye tɔ kɔ ba a tɔɔ̄. Bu edɛɛ̄, mɛnɛbuɛ̄ Jɛriko dā kɔ pya gɔā ɛp buɛ̄ eyira buɛ̄ a, e ba le tɔ Rehab. Nyɔwo, mɛnɛbuɛ̄ yere pya nɛɛ̄ kɔ ba a aa wa nua. Rehab gɔ̄ baɛ lo nɛɛ gɔā ɛp buɛ̄ a nyɔɔ ye tɔ sa kɔnɛ pya nɛɛ̄tam mɛnɛbuɛ̄ a kɔ: ‘Kaka pya nɛɛdam a bee mɛ lu loo, mɛ ba ekira. Lo ale bui kponia wa, bui gaa le tura wa!’ O suāge nu anua Rehab gaa kpega pya gɔā ɛp buɛ̄ ani?— Nyɔnɛbee a yira bu Jɛhova sa suā kɔ Jɛhova gaa le su buɛ̄ Kenan nɛ pya Izrɛl.

Lɛɛ pya lo nɛɛ gɔā ɛp buɛ̄ gae aa tɔ Rehab kiī, ba bee yira yii kɔ, a gaa le lu e kpɔā ye le pya ye tɔ sɔ̄ Jɛriko elu egbeesī. O suāge nu ba bee ye kɔnɛ kɔ a doo ni?— Ba bee kɔ: ‘Bɔp dodo eziī ama loo nwībū. Lo o doowo, dɛ̄dɛɛ̄ nɛɛ̄ ale o tɔ elu e kpɔā.’ Rehab bee doo taɛ taɛ nu pya gɔā ɛp buɛ̄ a, bee ye kɔ nɛ kɔ a doo. O suāge nu a sikɛ̄ sira ni?—

Sɔ̄ pio dee etɛna, pya Izrɛl bee kiā tɛɛ̄ ɛŋɛnɛ̄ lo buɛ̄ bu piī. Bu ini’ī biradee ba kiā tɛɛ̄ ɛŋɛnɛ̄ lo buɛ̄, ziī sɔ̄ bu ziī biradee. Mɛ nyɔɔ lo eree ɛrɛba bira dee ba kiā tɛɛ̄ ɛŋɛnɛ̄ buɛ̄ a, ɛrɛba sɔ̄. Lo sɔ̄ ba gbaa su gbɛnɛ muɛ̄ nwimākpā. Jɛhova bee doo kɔ ekpadaɛ̄ buɛ̄ ā, a dɔ ɔgara sī kɛ̄! Mɛ lo tɔ miimii eziī bee le nu nwībū a, lege e yira ya. O dapge muɛ̄ bu foto ni?— Rehab le pya ye tɔ bee lu e kpɔā!

 Ena olo dap nɔ̄ aāloo Rehab ani?— Rehab bee yira bu Jɛhova aāloo dɛ̄dɛɛ̄ nyɛŋia nu abee dā kumaloo Jɛhova. Olo gaa nɔ̄nage gbɛnɛ-edo nyɛŋia nu akiiloo Jɛhova. O ɛrɛ ge ye yira bu doodoo Rehab ni?— I suā kɔ o yira!