Predstavin tuke, hoj sal andro Jericho. Ada hin baro foros andre krajina Kanaan. O manuša ode na paťanas le Jehovas. Andre ada foros dživelas romňi, so pes vičinelas Rachab.

Sar sas e Rachab terňi čhaj, šunelas o pribehi pal o Mojžiš, sar rozdzeľinďa o lolo moros the sar iľa avri le Izraelčanen andal o Egipt. Thiš šunďa, sar o Jehovas lenge pomožinelas, kaj te vihrajinen o vojni, sar pes marenas peskere ňeprjaťeľenca. Akana oj dikhel, hoj peske o Izraelčana kerde taboris pašes paš o Jericho!

Jekhvar raťi avle duj Izraelčana počoral andro Jericho, kaj te dikhen, so oda hin za foros. On avle andro kher, kaj bešelas e Rachab. Oj len vičinďa andre a phenďa lenge, kaj ode te ačhen. Odi rat pes o kraľis, so vladňinelas andro Jericho dodžanľa, hoj andro foros hine duj Izraelčana andro kher, kaj bešel e Rachab. O kraľis bičhaďa slugaďen pre lende. E Rachab garuďa ole Izraelčanen pre strecha a phenďa le slugaďenge: „On sas ade, ale imar gele andal o foros. Denašen pal lende, mek len šaj dochuden!“ Džanes, soske ada e Rachab kerďa? — Bo paťalas le Jehovaske a džanelas, hoj ov dela o Kanaan le Izraelčanenge.

Sigeder, sar gele ala Izraelčana het andal o kher, sľubinde la Rachabake, hoj lake the lakera fameľijake pes ňič na ačhela, sar ela zňičimen o Jericho. Džanes, so mušinďa te kerel, kaj te el zachraňimen? — Phende lake: „Le kadi ľoľi šparga a zaphand la paš e oblaka, kaj te figinel avri. Te ada avka kereha, savore, so ena andre tiro kher, ena ochraňimen.“ E Rachab kerďa presňe oda, so lake phende. Džanes, so pes paľis ačhiľa? —

Pregele paru ďivesa a o Izraelčana chudne te phirel dookola le foroske. Sako ďives obgele ada foros jekhvar a ňiko paš ada na phenďa aňi lavoro. Avka ada kerenas 6 ďives. Ale eftato ďives phirenas dookola le foroske eftavar. Paľis chudne te vriskinel zorale hlasoha a o Jehovas kerďa, kaj pes o hradbi čiže muri le foroskere te rozperen. Ale o kher la ľoľa špargaha furt ačhelas! Dikhes ada pro obrazkos? — La Rachabake la fameľijaha pes ňič na ačhiľa!

 So tut šaj sikaves la Rachabatar? — E Rachab paťalas le Jehovaske, bo šunďa save bare veci ov kerďa. Thiš tut sikaves but lačhe veci pal o Jehovas. Paťas leske avka, sar e Rachab? — Amen džanas, hoj tu paťas!