SEHLUKO 3
Rahabi Bekanekukholwa KuJehova
Asesente shengatsi sisedolobheni laseJerikho. Lelidolobha liseveni laseKhenani, lelinebantfu labangakholwa kuJehova. Rahabi uhlala lapho.
Ngesikhatsi Rahabi aseyintfombatane, weva tindzaba letimayelana nendlela Mosi lawakhipha ngayo ema-Israyeli eGibhithe, futsi wehlukanisa Lwandle Lolubovu. Weva nangendlela Jehova lawasita ngayo ema-Israyeli kutsi ancobe titsa tawo. Nyalo uva kutsi ema-Israyeli amise emathende awo edvutane neJerikho!
Rahabi wavikela lamadvodza ngenca yekutsi bekanekukholwa kuJehova
Ngalelinye lilanga ntsambama, kwefika emadvodza lamabili langema-Israyeli atewuhlola lelidolobha laseJerikho. Aya endlini yaRahabi. Rahabi wawemukela, wawangenisa endlini yakhe. Ebusuku, inkhosi yaseJerikho yeva kutsi lamadvodza latewuhlola lidolobha abelapho futsi angene endlini yaRahabi. Ngako lenkhosi yatfumela bantfu kutsi bawalandze. Rahabi wawafihla eluphahleni lwendlu yakhe, wase utsi kulabantfu labatfunywe yinkhosi: ‘Lamadvodza abelapha, kepha sekahambile. Naningawagijimisa ningahle niwabambe!’ Yini leyenta Rahabi wavikela lamadvodza?— Kungenca yekutsi Rahabi abenekukholwa kuJehova futsi bekati kutsi Nkulunkulu utawunika ema-Israyeli lelive laseKhenani.
Ngaphambi kwekutsi lamadvodza lebekatawuhlola live esuke endlini yaRahabi, ametsembisa kutsi yena nemndeni wakubo bebatawusindza nakubhujiswa iJerikho. Lamadvodza amtjela kutsi enteni?— Atsi: ‘Tsatsa lentsambo lebovu uyilengise ngephandle kwelifasitelo lakho. Nawenta kanjalo, bonkhe labasendlini yakho batawusindza.’ Rahabi wenta loko lamadvodza labemtjele kona. Kwentekani ngemuva kwaloko?—
Jehova wasindzisa Rahabi kanye nemndeni wakubo
Ngemuva kwemalanga lambalwa, ema-Israyeli agegeletela lelidolobha, futsi abengakhulumi. Aligegeletela emalanga lasitfupha, futsi abeligegeletela kanye ngelilanga. Kodvwa ngelilanga lesikhombisa, aligegeletela tikhatsi letisikhombisa. Ngemuva kwaloko, onkhe amemeta kakhulu. Jehova wenta kutsi lolubondza lwalelidolobha ludzilike. Kodvwa lendlu lebeyinentsambo lebovu lelenga efasitelweni ayizange iwe! Uyayibona yini esitfombeni?— Rahabi nemndeni wakubo basindza!
Yini longayifundza kuRahabi?— Rahabi abenekukholwa kuJehova ngenca yato tonkhe tintfo letimangalisako labetifundze ngaNkulunkulu. Nawe ufundza tintfo letinyenti letimangalisako mayelana naJehova. Uyakholwa yini kuJehova njengaRahabi?— Siyati kutsi uyakholwa!
