WEKELO 3
Rahaba aki la mbetawɔ le Jehowa
Tɔshi dia tekɔ l’osomba wa Jɛriko. Osomba ɔsɔ wekɔ lo nkɛtɛ ya Kanana, ndo anto wa lɔkɔ bu la mbetawɔ le Jehowa. Womoto ɔmɔtshi lelɛwɔ Rahaba ekɔ lo mbidjasɛ lɔkɔ.
Etena kakinde eke dikɛnda, Rahaba akoke ɛkɛndɔ efula wendana la woho wakaatola Mɔsɛ Ndjale ka beela ndo woho wakandatondja ase Isariyɛlɛ oma l’Edjibito. Nde akoke nto woho wakaakimanyiya Jehowa dia nɛndja atunyi awɔ. Kakianɛ, nde amboka di’ase Isariyɛlɛ wambohanga suke la Jɛriko.
Rahaba akashɛ atɔpi nɛ dia nde akonge la mbetawɔ le Jehowa
La dikɔlɔ dimɔtshi, ase Isariyɛlɛ ahende wakatshu la Jɛriko dia tokemba osomba. Vɔ wakakome lo luudu laki Rahaba. Nde akaalɔmbɛ dia vɔ mbɔtɔ lo luudu ndo momuya. L’otsho, nkumekanga ka Jɛriko akoke di’atɔpi wekɔ l’osomba ndo ɔnɛ vɔ wekɔ laka Rahaba. Ɔnkɔnɛ, nde akatome anto dia towanda. Rahaba akashɛ atɔpi asɔ l’odiko wa luudu lande ndo nde akatɛ anto wakatomama oma le nkumekanga ate: ‘Eelo mɛtɛ atɔpi akɔ waki lanɛ, koko vɔ wakashidi ntomba oma l’osomba. Naka nyu mbayela kakianɛ, kete nyu mbeyaka towanda.’ Onde wɛ mbeyaka lande na kakashɛ Rahaba atɔpi asɔ?— Nɛ dia nde aki la mbetawɔ le Jehowa ndo akeyaka dia nde ayosha ase Isariyɛlɛ nkɛtɛ ya Kanana.
La ntondo k’atɔpi asɔ ntomba oma lo luudu la Rahaba, vɔ wakolake dia nde la nkumbo kande wayoshimbamɛ etena kayolanyema Jɛriko. Onde wɛ mbeyaka kɛnɛ kakawawotɛ dia nde nsala?— Vɔ wakawotɛ vɔate: ‘Ɔsa ɔkɔdi wa beela ɔnɛ ndo kelekawɔ l’andja wa didishi diayɛ. Naka wɛ nsala ngasɔ, kete onto tshɛ layonga lo luudu layɛ ayoshimbamɛ.’ Rahaba akasale kɛnɛ tshɛ kakawotɛ atɔpi asɔ. Onde wɛ mbeyaka kɛnɛ kakayotombaka l’ɔkɔngɔ?—
Jehowa akashimbɛ Rahaba nde la nkumbo kande
Yema tshitshɛ l’ɔkɔngɔ wa laasɔ, ase Isariyɛlɛ wakatshimbe osomba aha la ntɛkɛta. Lushi tshɛ, vɔ wakatshimbaka osomba mbala ɔtɔi, l’edja ka nshi shamalo. Koko lushi l’esambele, vɔ wakatshimbe osomba mbala esambele. Oma laasɔ, vɔ tshɛ wakade ekoko wa wolo. Jehowa akanyukola mpele di’osomba. Koko luudu laki la ɔkɔdi wa beela wakalɛndalɛndaka lo didishi koonyukɔ. Onde wɛ koka mɛnyami luudu lakɔ l’osato ɔnɛ?— Rahaba nde la nkumbo kande wakashimbamɛ.
Wetshelo akɔna wakokayɛ nkondja oma l’ɔkɔndɔ wa Rahaba?— Rahaba akonge la mbetawɔ le Jehowa l’ɔtɛ w’akambo wa diambo wakandoke lo dikambo dia Jehowa. Ndo wɛ lawɔ ekɔ lo mbeka akambo efula wa diambo wendana la Jehowa. Onde wɛ ekɔ la mbetawɔ le Jehowa oko Rahaba?— Sho mbeyaka dia wɛ ekɔ la mbetawɔ.
