Tau pehē pē ‘oku tau ‘i he kolo ko Sielikoó. Ko e kolo eni ‘i he fonua ko Kēnani, ‘a ia ko e kakai aí na‘e ‘ikai ke nau tui kia Sihova. Na‘e nofo ai ‘a e fefine ko Lēhapi.

‘I he taimi na‘e kei si‘i ai ‘a Lēhapí, na‘á ne fanongo ai ki he ngaahi talanoa fekau‘aki mo Mōsese ‘i he‘ene taa‘i ‘a e Tahi Kulokulá pea taki atu ‘a e kakai ‘Isilelí mei ‘Isipite. Na‘á ne toe fanongo fekau‘aki mo e founga hono tokoni‘i kinautolu ‘e Sihova ke nau ikuna ‘i he faitau mo honau ngaahi filí. ‘I he taimi ko ení ‘okú ne fanongo ‘oku ‘apitanga ‘a e kau ‘Isilelí ‘o ofi mai ki Sielikō!

‘I ha efiafi ‘e taha, na‘e ō ai ‘a e ongo ‘Isileli ‘e toko ua ki Sielikō ke asiasi ki he koló. Na‘á na ha‘u ki he fale ‘o Lēhapí. Na‘á ne fakaafe‘i kinaua ke na hū ange mo nofo ai. Lolotonga ‘a e pō ko iá, na‘e ‘ilo‘i ‘e he tu‘i ‘o Sielikoó ‘oku ‘i he koló ‘a e ongo asiasí pea na‘á na ō ki he fale ‘o Lēhapí. Ko ia na‘e fekau‘i ‘e he tu‘í ha kau tangata ke puke kinaua. Na‘e fūfuu‘i ‘e Lēhapi ‘a e ongo asiasí ‘i he funga ‘ato lafalafa ‘o hono falé pea tala ange ki he kau tangata ‘a e Tu‘í: ‘Na‘e ‘i heni ‘a e ongo asiasí ka kuó na ‘osi ‘alu mei he koló. Kapau te mou ‘alu ‘i he taimí ni te mou ma‘u kinaua!’ ‘Okú ke ‘ilo ‘a e ‘uhinga na‘e malu‘i ai ‘e Lēhapi ‘a e ongo asiasí?— Koe‘uhí na‘á ne tui kia Sihova mo ‘ilo‘i te ne foaki ‘a e fonua ko Kēnaní ki he kau ‘Isilelí.

Ki mu‘a ke mavahe ‘a e ongo asiasí mei he fale ‘o Lēhapí, na‘á na palōmesi ange ‘e fakahaofi ia mo hono fāmilí he taimi ‘e faka‘auha ai ‘a Sielikoó. ‘Okú ke ‘ilo‘i ‘a e me‘a na‘á na tala ange ke ne faí?— Na‘á na pehē: ‘To‘o ‘a e maea kulokula ko ení ‘o tautau ia ‘i tu‘a ‘i ho matapā sio‘atá. Kapau te ke fai ia, ko e tokotaha kotoa pē ‘i ho falé ‘e hao.’ Na‘e fai ‘e Lēhapi ‘a e me‘a tofu pē na‘e tala ange ‘e he ongo asiasí ke ne faí. ‘Okú ke ‘ilo ‘a e me‘a na‘e hoko atu aí?—

Hili ha ngaahi ‘aho si‘i mei ai, na‘e laka takai fakalongolongo ‘a e kau ‘Isilelí ‘i he koló. Na‘a nau laka takai ‘i he koló ‘i he ‘aho ‘e ono, ‘o tu‘o taha ‘i he ‘aho. Ka ‘i he ‘aho hono fitú na‘a nau laka takai ‘i he koló ‘o tu‘o fitu. Pea nau toki kaila le‘o lahi kotoa. Na‘e ‘ai ‘e Sihova ‘a e ngaahi ‘ā takatakai ‘i he koló ke holafa ki lalo. Ka ko e fale na‘e  tautau ai ‘a e maea kulokula ‘i he matapā sio‘atá na‘e kei tu‘u pē ia! ‘E lava ke ke sio ki ai ‘i he fakatātaá?— Na‘e hao ‘a Lēhapi mo hono fāmilí!

Ko e hā ‘e lava ke ke ako meia Lēhapí?— Na‘e tui ‘a Lēhapi kia Sihova koe‘uhi ko e ngaahi me‘a fakaofo kotoa na‘á ne ako fekau‘aki mo Sihová. ‘Okú ke ako foki mo koe ‘a e ngaahi me‘a fakaofo lahi fekau‘aki mo Sihova. ‘Okú ke tui kiate ia ‘o hangē ko e me‘a na‘e fai ‘e Lēhapí?— ‘Oku mau ‘ilo‘i ‘okú ke fai pehē!