CIIYO 3
Rahabu Wakasyoma Jehova
Atweezyeezye kuti tuli mumunzi wa Jeriko. Munzi ooyu uli munyika ya Kanana, bantu mobatasyomi Jehova. Mukaintu wiitwa kuti Rahabu nkwakkala ooku.
Rahabu naakacili mwana, wakamvwa makani aajatikizya Musa mbwaakaandaanya Lwizi Lusalala akusololela bana Israyeli kuzwa mu Egepita. Alimwi wakamvwa Jehova mbwaakabagwasya kuzunda munkondo nzyobakali kulwana abasinkondonyina. Lino wamvwa kuti bana Israyeli bali bungene afwaafwi a Jeriko!
Rahabu wakabakwabilila basikutwela akaambo kakuti wakali kusyoma Jehova
Buzuba bumwi kumangolezya, bana Israyeli bobilo baunka ku Jeriko kuyootwela munzi. Basika aŋanda ya Rahabu. Wabatambula akubanjizya muŋanda yakwe. Masiku, mwami wa Jeriko wazyiba kuti kuli basikutwela mumunzi alimwi akuti bali muŋanda ya Rahabu. Aboobo mwami watuma baalumi kuti babajate. Rahabu wabasisa basikutwela bobilo aciluli cipapalete caŋanda yakwe akwaambila bantu bamwami kuti: ‘Basikutwela baliko, pele bazwa kale mumunzi. Ikuti mwabatobela, mulakonzya kubeenzya!’ Sena ulizyi kaambo Rahabu ncaabakwabilila basikutwela?— Nkaambo kakuti usyoma Jehova alimwi ulizyi kuti Leza uyoobapa nyika ya Kanana bana Israyeli.
Basikutwela kabatanazwa muŋanda ya Rahabu, bamusyomezya kuti walo abamukwasyi wakwe bayoofwutuka waakunyonyoonwa munzi wa Jeriko. Sena ulizyi ncobamwaambila kucita?— Bamwaambila kuti: ‘Ndoolu lutambo lusalala, ulwaangilile kuwindo lyako. Ikuti ucite oobo, boonse bali muŋanda yako bayoofwutuka.’ Rahabu wacita mbubwenya mbobamwaambila basikutwela. Sena ulizyi cakatobela?—
Jehova wakamufwutula Rahabu amukwasyi wakwe
Nokwainda mazuba masyoonto buyo, bana Israyeli bauzinguluka munzi cakaumuumu. Bacita oobo mazuba aali cisambomwe, ciindi comwe buzuba abuzuba. Pele mubuzuba bwaciloba, bauzinguluka munzi ziindi zili ciloba. Mpoonya boongolola boonse. Jehova wapa kuti bwaanda bwamunzi bukolomoke. Pele ŋanda iijisi lutambo lusalala awindo tiiyawa pe! Sena uliibwene ŋanda mucifwanikiso?— Rahabu amukwasyi wakwe bafwutuka!
Ncinzi ncokonzya kwiiya kuli Rahabu?— Rahabu wakali kusyoma Jehova akaambo kazintu zyoonse zibotu nzyaakaiya kujatikizya nguwe. Anduwe wiiya zintu zibotu zinji kujatikizya Jehova. Sena ulamusyoma mbuli mbwaakacita Rahabu?— Tulizyi kuti ulamusyoma!
