Fakaataata i ‵tou mafaufau me e ‵nofo atu tatou i te fa‵kai o Ieliko. A te fa‵kai tenei e tu i loto i te fenua o Kanana, telā e se tali‵tonu a tino i ei ki a Ieova. E nofo atu i konā se fafine e igoa ki a Lahapa.

I te taimi koi foliki ei a Lahapa, ne lagona ne ia a tala e uiga ki te auala ne ‵vae aka ei ne Mose a te Tai ‵Kula kae ‵taki atu keatea a te kau Isalaelu mai Aikupito. Ne lagona foki ne ia a te auala ne fesoasoani atu ei a Ieova ki a latou ke manumalo i te taua atu ki olotou fili. Nei la, ko lagona ne tou fafine me ko ‵nofo pili atu a te kau Isalaelu ki Ieliko!

I te afiafi e tasi, ne olo atu a tāgata Isalaelu e tokolua ki Ieliko o lamalama te fa‵kai. Ne olo atu lāua ki te fale o Lahapa. Ne ‵kami ne tou fafine lāua ki loto kae ke ‵nofo atu foki i ei. I te po tenā, ne iloa ne te tupu o Ieliko me ko oti ne oko atu a sipai ki loto i te fa‵kai kae ne olo atu ki te fale o Lahapa. Tela la, ne uga atu ne te tupu a tāgata ke puke mai lāua. Ne ‵funa ne Lahapa a sipai e tokolua i te tuafale pāpā o tena fale kae fai atu ki tāgata a te tupu: ‘Ne ‵nofo i konei a sipai, kae ko oti ne olo atu lāua kea‵tea mai te fa‵kai. Kafai e olo atu koutou nei, koi mafai eiloa o ‵po aka ne koutou a lāua!’ E iloa ne koe me se a te pogai ne puipui ei ne Lahapa a sipai konei?— Me ne talitonu a ia ki a Ieova kae ne iloa foki ne ia me ka tuku atu ne ia te fenua o Kanana ki te kau Isalaelu.

A koi tuai o olo atu keatea a sipai mai te fale o Lahapa, ne tauto atu lāua me ka faka‵sao atu tou fafine mo tena kāiga i te taimi e fakaseai atu ei a Ieliko. E iloa ne koe me se a te mea ne fai atu ne lāua ke fai ne tou fafine?— Ne fai atu lāua: ‘Puke te laugatu ‵kula tenei, kae fakatāutāu ki tua mo tou famalama. Kafai e fai ne koe, ko tino katoa i loto i tou fale ka ‵sao.’ Ne fai eiloa ne Lahapa a mea ne fai atu ne sipai ke fai ne lāua. E iloa ne koe me se a te mea ne tupu mai tua ifo?—

I nai aso mai tua ifo, ne māti fakatamilo atu mo te filemu a te kau Isalaelu i te fa‵kai. I aso e ono, ne māti fakatamilo atu latou i te fa‵kai, fakatasi i te aso. Kae i te fitu o aso, ne māti fakatamilo atu latou i te fa‵kai fakafitu taimi. I te otiga, ne paka‵laga eiloa latou  ki luga. Ne fai ne Ieova ke ma‵lepe ifo a ‵pui i te fa‵kai. Kae ko te fale telā e tautau mai i ei a te laugatu ‵kula ne tu eiloa! E a, e lavea atu ne koe i te ata?— Ne ‵sao atu a Lahapa mo tena kāiga!

Ne a mea e mafai o tauloto ne tatou mai i a Lahapa?— Ne talitonu a Lahapa ki a Ieova ona ko mea ‵gali katoa kolā ne tauloto ne tou fafine e uiga ki a ia. Ko tauloto foki ne koe a mea ‵gali e uke e uiga ki a Ieova. E mata, e talitonu koe ki a ia e pelā mo Lahapa?— E iloa ne au me e talitonu foki koe!