Hunahunaon naton nga aadto kita ha syudad han Jerico. Ini nga syudad sakop han Canaan, usa nga lugar diin an mga tawo diri natoo kan Jehova. Naukoy dinhi an usa nga babaye nga an ngaran Rahab.

Han bata pa hi Rahab, nahibaroan niya an mga istorya mahitungod han pagtungaa ni Moises han Dagat nga Pula ngan han iya pagpanguna ha mga Israelita paggawas ha Ehipto. Nahibaroan liwat niya an ginhimo ni Jehova basi buligan hira nga magdaog ha ira mga pakig-away. Yana, nahibaroan niya nga nagkakampo an mga Israelita hirani ha Jerico!

Usa ka gab-i, duha nga Israelita an nagpakadto ha Jerico basi mag-espiya hito nga syudad. Kinadto hira ha balay ni Rahab, ngan ginpasulod niya hira. Hito nga gab-i, nahibaroan han hadi han Jerico nga may mga espiya nga nakasulod ha syudad ngan kinadto ha balay ni Rahab. Salit nagsugo an hadi nga dakpon an mga espiya. Gintago ni Rahab an duha nga espiya ha patag nga atop han iya balay ngan nagsiring ha mga tawohan han hadi: ‘Nakadi kanina an mga espiya, pero binaya na hira ha syudad. Kon lalanaton niyo hira yana, maaabtan pa niyo hira!’ Maaram ka ba kon kay ano nga ginprotektaran ni Rahab an mga espiya?— Kay natoo hiya kan Jehova ngan maaram hiya nga ihahatag ni Jehova an Canaan ha mga Israelita.

Antes bumaya an mga espiya ha balay ni Rahab, nagsaad hira nga matatalwas hiya ngan an iya pamilya kon bungkagon na an Jerico. Maaram ka ba kon ano an ira ginpahimo kan Rahab?— Nagsiring hira: ‘Ibitay ini nga pula nga pisi ha gawas han iyo bintana. Kon buhaton mo ini, matatalwas an ngatanan nga aada ha imo balay.’ Ito gud an ginbuhat ni Rahab. Maaram ka ba kon ano an sunod nga nahitabo?—

Paglabay hin pira ka adlaw, an mga Israelita nagmartsa hin mamingaw ha palibot han syudad. Unom ka adlaw nga nagmartsa hira hin usa ka beses kada adlaw. Pero han ikapito ka adlaw, nagmartsa hira hin pito ka beses ha palibot han syudad. Katapos, hira ngatanan gumuliat hin makusog. Ngan ginpahinabo ni Jehova nga marumpag an mga pader ha palibot han syudad. Pero an balay nga may nakabitay ha bintana nga pula nga pisi waray gud marumpag! Nakikita mo ba ito ha retrato?— Natalwas hi Rahab ngan an iya pamilya!

 Ano an imo mahibabaroan mahitungod kan Rahab?— Hi Rahab tinoo kan Jehova tungod han ngatanan nga mag-opay nga butang nga iya nahibaroan mahitungod kan Jehova. Damu liwat an imo nahibabaroan nga mag-opay nga butang mahitungod kan Jehova. Natoo ka ba ha iya pariho kan Rahab?— Maaram gud kami nga natoo ka!