Wil mol ba opi gambar mia e hehalal rena?— Neng nuku ba hana he Yefta hei hewil. Wil hedi hana Surah Rieling dewal wopokafani na, haba Surah Rieling dewofang de Yehuwa ya hema homi hado kang hamol. Mie, Yefta ya hewil mol hei he falaka pi mihalal.

Yefta mu ama neng ba kulkang. Yehuwa hei Yefta dawa dewal miharang na miy dewil wohadasakolah. Dedi bay de neng rumai, ya de tapong puna kang. Hediwuhe ama Israel de heiy miahiy ba de yenang iyeri minatea.

Leng nuku dara yenang he ya na, Yefta de doa mi Allah her. Yefta de pakang, de heiy mi iy, de dawai ama ahola ba hatang hepaniy de miy Yehuwa her. Ama  hedi de birang de puna ya Yehuwa he tabernakel mi awang. Tabernakel mu Allah heyera ba ama Israel wei de hei mi Ibadat. Haba, hedimia Yefta heiy mi iy diy! Yefta de dawai la ahola mahe hatang hepaniy?—

Heimu, hewil mol! Yefta hewilmu hei nuku wala, haba yala Yefta de domi rofi puna habot. Yefta homi wofalar. Haba, Yefta dong Yehuwa hadapakang diy. Hewil mol bay dewofang, ’Nima ong Yehuwa hadapakang diy hare awa heyera mi iy te.’

Yefta hewil mol bay homi dema hewofalar. Tabernakel mia de wala neng miy na ya wala wil hadoa na. Haba, dekul domaha dema homong ya pakang hei haluol ba Yehuwa homi hado kang. De wotanut Yehuwa hei mu kulkang, hekang mu neng miy ya wil hadoa waldosama na. Hare, dedi bay detofa de doiti, de birang de puna tabernakel miya.

E wotanut, de Yehuwa ya dema homi hado kang hamol rena?— Rofi! Ridi bay ri heiwuda kang. Ri Yehuwa heluk ya mihiyena, riya rima ya Yehuwa homi kang hamol.