4 YATICHÄWI
Jupajj tataparusa Jehová Diosarusa wal kusisiyäna
¿Kunsa Jefté chachajj Jehová Diosar mayisiskpacha?
Tatapan arsutapar phoqañajj chʼamäkchïnsa, taqe chuymaw uk phoqäna
¿Aka jiskʼa imillajj khitïpachasa?... Tatapajj Jefté satänwa. Janiw uka jiskʼa imillan sutipajj Biblian uñstkiti. Ukampis jupan luratanakapajj tataparusa Jehová Diosarusa wal kusisiyäna. Jichhajj uka jiskʼa imillampita tatapampita jukʼamp yateqañäni.
Jefté chachajj suma jaqënwa. Ukat phuchaparu Jehová Diosat yatichañatakis tiemp apstʼasirïnwa. Suma pʼeqtʼiri ukat wali chʼamani jaqerakïnwa. Ukatwa israelitanakajj enemigonakapar atipjañatakejj jupar mayipjjäna.
Jefté chachajj nuwasïwin atipjañatakejj Diosaruw wal mayisïna. Juramentompiw akham arsüna: “Utar kuttʼä ukhajja, khititï utajat nayar katoqer nayraqat mistunkani, ukajj Jumar katuyatäniwa” sasa. ¿Kunsa ukampejj sañ munäna? “Uka jaqejj jiwañapkamaw tabernaculon trabajini ukat jakarakini” sañwa munäna. Jaqenakajj ukaruw Jehová Diosar yupaychir sarapjjerïna. ¿Jefté chachajj uka nuwasïwin atipjpachänti? ¡Jïsa! Ukat ¿khitis utapat katoqer nayraqat mistunpachäna?...
¡Phuchapaw mistunïna! Jefté chachajj mä sapa phuchanikïnwa. Amtañäni, “nayraqat mistunkani ukajj Jumar katuyatäniwa” sasarakis Jefté chachajj Jehová Diosar sänjjä, jichhajj jayaruw phuchapajj sarjjañapäna. Ukatwa awkipajj wal llakisïna. Phuchapasti, akham sasaw jupar säna: “Kuntï Diosarojj arskta ukjja, phoqañamawa” sasa.
Amiganakapajj sapa maraw visitir sarapjjäna
Qalltanjja, phuchapajj llakisirakïnwa. Tabernaculon jakasajja janiw casarasiñapäkänti ni wawanïñapäkänsa. Ukhampachasa, kuntï awkipajj arskatayna ukwa phoqañ munäna. Ukaw jupatakejj casarasiñatsa wawanïñatsa jukʼamp wakiskirïna. Ukatwa tabernaculor sarjjäna, ukansti jiwañapkamaw jakarakïna.
¿Jehová Diosasa Jefté tatapas ukham luratapat kusisipjjpachänti?... ¡Jïsa! Jumajj Jefté chachan phuchapat yateqasirakismawa. Jumatï Jehová Diosar istʼäta ukat munasirakïta ukhajja, tatamarusa, mamamarusa Jehová Diosarusa wal kusisiyäta.
