Baa u ntehe hingonda hini i titii?— A yé man muda nu mut wada ba bé sébél le Yéfta. Bibel i nkal bé bés jôl li hingonda hi, ndi di nyi le a bi kônha isañ bo Yéhôva maséé. Di nigil ngim jam inyu yé ni inyu isañ, Yéfta.

Yéfta a bé loñge mut, a bé tégbaha ngandak ngéda i niiga man wé nu muda mam ma mbéñge Yéhôva. A bé ki mut a gwé ngui, a bak ki loñge ñéga bôt. Jon Lôk Israél i bi bat nye le a éga bo i jôs baoo bap.

Yéfta a bi soohe Djob le a hôla nye i yémbél. Yéfta a bi bôn le, ibale a nyémbél, a ga ti Yéhôva mut bisu a ga pémél ndap yé ngéda a mba a nhuu.  Mut nu a bé lama sal i lap Yéhôva, a yéénege nyoo inyu niñ yé yosôna. I lap i, i bé homa bôt ba bé ke i bégés Djob ha ngéda i. I pam ni le Yéfta a yémbél! Baa u nyi njee a bé mut bisu i pam i ndap yé ngéda a bi huu?—

A bé man Yéfta nu muda! A bé mpom wé man, ndi hanano Yéfta a bé lama ep nye haa ni nye. Hala a bi nôgha nye ndutu ngandak. Ndi hoñol le, a bi boñ mbônga. Nlélém ngéda, ngont yé i kal nye le: ‘A ta, u mal bôn Yéhôva, u gwé le u boñ hala.’

Yak man Yéfta nu muda a bi nok ndutu ngandak. I lap i Djob, a bé bé le a biiba to bana bon. Ndi a bééna ngôñ i yônôs mbônga u isañ ni i kônha Yéhôva maséé. Hala a bé nye nseñ ngandak i lee libii ni bana bon. Jon a bi nyodi ndap isañ, a ke i lap i Djob inyu niñ yé yosôna.

Baa u nhoñol le i jam a bi boñ li bi kônha isañ bo Yéhôva maséé?— Ñ, li bi kônha bo maséé! Ibale u yé manôgla, u gwéhék ki Yéhôva, u nla ba kiki man Yéfta nu muda. Yak we u ga kônha bagwal boñ ni Yéhôva maséé ngandak.