PARSIAJARAN 4
Ibana Mambahen Amana dohot Jahowa Marlas ni Roha
Aha do janji ni si Jepta tu Jahowa?
Nang pe maol, lomo do roha ni boru ni si Jepta asa boi amana manggohi janjina tu Jahowa
Diida hamu do anak boru na di gombar on?— Boru ni si Jepta do ibana. Ndang adong dipaboa di Bibel ise goar ni borua on, alai dibahen do amana dohot Jahowa marlas ni roha. Tajaha ma sarito taringot si Jepta dohot boruna i.
Si Jepta sahalak baoa na burju jala jotjot do diajarhon ibana tu boruna taringot Jahowa. Baoa na gogo do ibana jala sahalak pangulu ni tentara na burju. Alani i, dipillit halak Israel ma ibana manguluhon nasida tingki marporang.
Sada tingki, andorang so borhat si Jepta marporang, martangiang ma ibana tu Jahowa. Marjanji ma ibana molo monang sian parporangan, jolma na parjolo ro manjumpangi ibana, lehononna tu Jahowa. Ingkon maringanan di tabernakel do jolma na dijanjihonna i, jala lehononna ma dirina marhobas tu Jahowa. Tabernakel, i ma inganan ni halak Israel laho manomba Debata. Tutu ma, si Jepta na monang di parporangan i! Dung mulak si Jepta sian parporangan i, ise do jolma na parjolo ro manjumpangi ibana?—
Boruna sandiri do! Holan sasada i do boruna, jala ingkon sian ias ni rohana do ibana mangalehon boruna i laho tu tabernakel. Mansai lungun do roha ni si Jepta. Alai, nunga marjanji ibana tu Jahowa. Didok boruna i ma: Bapak, molo naung marjanji do ho tu Jahowa, bahen ma songon na nidokmi tu ahu.
Ganup taon, ro do angka dongan ni boru ni si Jepta laho manjumpangi ibana
Dohot do lungun roha ni boru ni si Jepta on. Di tabernakel, ndang boi ibana marhamulian dohot marianakhon. Alai, lomo do rohana asa boi amana manggohi janjina jala palashon roha ni Jahowa. Molo di ibana, i do na rumingkot sian na muli manang marianakhon. Jadi, borhat ma ibana jala maringanan di tabernakel ma ibana saleleng ni ngoluna.
Molo pandapotmu, tutu do ibana palashon roha ni amana dohot Jahowa?— I do, tutu do i! Hita pe boi do songon ibana. Molo taoloi Jahowa jala tahaholongi Ibana, marlas ni roha ma natorasmuna dohot Jahowa.
