Dennin min bɛ ja kan i ɲɛ bɛ o la wa?— Cɛ min tun tɔgɔ ko Jefite o de denmuso don. Bibulu ma a tɔgɔ fɔ an ye, nka an b’a dɔn ko a ye a fa ani Jehova nisɔndiya. An k’a ɲini ka o dennin ni a fa Jefite dɔn.

Jefite tun ye mɔgɔ ɲuman ye ani a tun bɛ waati caman ta walasa ka a denmuso kalan Jehova ka ko la. Fangaba tun bɛ a la wa ɲɛmɔgɔ ɲuman tun don. O de la Israɛlkaw y’a ɲini a fɛ a ka bila olu ɲɛ, u ni u juguw ka kɛlɛ la.

Jefite ye Ala deli walisa a ka a dɛmɛ a ka se sɔrɔ. Jefite ye layidu ta ko ni a ye se sɔrɔ, mɔgɔ fɔlɔ min bɛ bɔ a ka so dafɛ n’a kɔseginna, a bɛ o tigi di Jehova ma. O tigi na to Ala ka finiso kɔnɔ ka baara kɛ a si tɔ bɛɛ la. O waati la, finiso tun ye yɔrɔ ye mɔgɔw  tun bɛ Ala bato yɔrɔ min na. Sisan, Jefite ye se sɔrɔ kɛlɛ la! Yala i ba dɔn mɔgɔ fɔlɔ min bɔra a ka so, tuma min na a kɔseginna wa?—

Ɔwɔ, Jefite denmuso don! Ale kelen dɔrɔn de tun ye Jefite den ye, wa sisan Jefite bɛna a bila ka taa yɔrɔ wɛrɛ. O ye Jefite dusu kasi kosɛbɛ. Nka i hakili to a la ko Jefite tun ye layidu ta. O yɔrɔnin bɛɛ a denmuso y’a fɔ a ye ko: ‘Baba, i ye layidu ta Jehova ye, o la o layidu dafa.’

Jefite denmuso fana dusu kasira. K’a to finiso la, a tɛ se ka furu ani ka denw sɔrɔ. Nka a tun ka di a ye kosɛbɛ ka a fa ka layidu dafa ani ka Jehova nisɔndiya. O nafa tun ka bon a bolo ka tɛmɛ furu kan walima ka denw sɔrɔ. O la a bɔra u ka so ka taa to finiso la a si tɔ bɛɛ la.

E hakili la a ye min kɛ o ye a fa ani Jehova nisɔndiya wa?— Ɔwɔ, a ye u nisɔndiya! Ni i bɛ kanminɛli kɛ ani ni i bɛ Jehova kanu, i bɛ se ka kɛ i ko Jefite denmuso. E fana bɛna i bangebagaw ni Jehova nisɔndiya kosɛbɛ.