ˈCƖƐCƖƐKÏBHÏ 4
Ɔ zʋ a-a ˈɔ dɩba -ɲɛ Zoova ˈsɔ ˈmäna dlɩ zɛmö
ˈSaa Zɛfötee ˈɲɛ bhä Zoova ˈdɩ nɩɩ ɔ yi nʋ ˈnɩ?
Mö yɩ ˈtɛɛ a-a teɲii maa, Zɛfötee ˈa ŋlʋyu ˈzʋ a-a zoova ˈklʋkpamö
-N ylɩ ɔ ŋlʋyu ɔ -wʋä -lɛ foto ˈklʋ ˈwʋ -a?— Nɩkpɛ -bhlʋ wa laa Zɛfötee ˈa ŋlʋyuä. Biblë -nɩɲɩɛ ɔ ˈŋlɩ sʋlʋnɩ. Maa -a -yi sɛ nɩɩ, ɔ zʋ a-a ˈɔ dɩba -ɲɛ Zoova ˈsɔ ˈmäna dlɩ zɛmö. Ɔ -ɲɛ ˈɔ dɩba ˈsɔ -a nɩ yɩbhlɩnuë sasɛ.
Zɛfötee, nɩkpɛ a -mɔ nɛnɩ a-a ˈmö ɔ glɩnɩ a-a. ˈN ɔ yiɛ ˈtɛɲɩ a -bɛ ˈmö Zoova ˈɔ -yɛŋlɛ sʋlʋnɩ. ˈMö ɔ ˈtɛɛ a-a teɲii n ɔ -yiˈɛ ˈkämanɩsɛ. Nza Yizlaɛlɩ a -nʋa yɩbhä a-a nɩɩ, mɔ nɩ -gänuë ˈyuku wa -ɲɛ ˈwa -gblɩwa -kä gwɩɛ mö.
Zɛfötee bhibhe a-a Lagɔ ɔ ˈkuë kwänɩ nzɩ wa ˈkuë ˈwlu ˈplɩ. Zɛfotee yiɛ zligo, ɔ lɛ naa, ɔ -kuë ˈwlu ˈplɩ, ɔ -kä ˈwlu sɩbhää, tɛkänɩkpɛ -ɔ ˈkää -mä ˈɔ -budu ˈmö ˈwlʋ, -ɔ -kɔɔ ˈyio ˈwʋ yi, ˈmö ɔ ˈkää Zoova ˈɲɛ. Nɩkpɛ ˈla, ɔ kä ɔ ˈkä -mä Lagɔbudu ˈmö ˈkwädlɩnɩ libho nʋ. Lagɔbudu ˈla, ˈmö -mä nɩkpaa bʋbɔnɩ a-a Lagɔ. -Tiamö, Zɛfötee -mɔ ˈplɩɛ ˈwlu. Ɔ ghlɛɛ -mä ˈɔ ˈligbëa ˈmö, -n -yi bhä -ɔ yo tɛɛ ˈyio ˈwʋ -a?—
Nn, Zɛfötee ˈa ŋlʋyu mɔɔ. Zɛfötee ˈa ˈyu -bhlʋ -kpɔ ˈmö ɔ glɩnɩ a-a. Ɔ kä a-a ɔ ˈkɔ -sɩkaa käböbhɛyɩ kwä. Yɩ ˈkuanɔɔ swɩ yɔwʋ teɲii. Maa ligba nɩɩ, ɔ yɛa Lagɔ ˈa ˈyila ˈˈklʋ zligonɩ ˈwë. ˈƆ ŋlʋyu lɛ nɩɩ, ‘Atʋ, ˈsaa -n gbä a-a -n ˈkä Zoova a dɛ nʋ, ˈmö -n -kää -n ˈkä nʋ cuu.’
Sɛɛ ˈylʋba ˈplɩɛ -sɩbhä Zɛfötee ˈa ŋlʋyuu a bhɛya mɔ a-a ˈylɩmöä
Swɩ yɛ a-a Zɛfötee ˈa ŋlʋyu yɔwʋ ˈkunɩ ˈgämö. -Mä lagɔbudu ˈmö, ɔˈɔ ˈkä ghlɩ ˈmö ˈn ɔˈɔ ˈkäˈɛ ˈyu gwälɩ. Maa ɔ yɩbhä a-a teɲii ɔ ˈkä ˈɔ dɩba ˈa wɛlɩɩ ˈklʋkpamö ˈzʋ ˈn ɔ ˈkäˈɛ Zoova ˈmäna dlɩ zɛmö ˈzʋ. Mii kä a-a ɔ dɛ dɛsɛ mii zie ghlɩmömɛ -ɲɛ ˈyuë gwälɩgwälɛ ˈsɔ ˈwʋ. Nza ɔ ylɛɛ -mä ˈligbë ˈmö ˈn ɔ yi a-a -mä lagɔbudu ˈmö sɛ glɩɛ mö.
-Na dɔˈwʋ sɛ ɔ zʋ a-a daˈa, ˈzʋ bhä ˈɔ dɩba -ɲɛ Zoova ˈsɔ ˈmäna dlɩ zɛmö -a?— Nn! -N -kä -na -lowluwa a ˈklʋkpa -kä, ˈn -n -käˈɛ Zoova -wa, Zɛfötee ˈa ŋlʋyu a sa -n yiˈɛ -na -lowluwa -ɲɛ Zoova ˈsɔ ˈmäna dlɩ zɛmö zʋmö.
