Ye ô lôô mona minga a ne fôtô nyi?— A ne ngo Jephthé. Kalate Zambe a ve ke bia éyôlé jé, ve jame bia yem é ne na, a nga ve ésa wé a Yéhôva nleme mvaé. Bi tame zu yé’é ajô dap.

Jephthé a mbe mbamba môt, a mbe a nyoñ éyoñe ya ye’ele mone wé mam ma lat a Yéhôva. A mbe fe éwôlô môt a mbamba ntebe ôsu. Ajô te nde bone be Israël be nga sili nye na, a nyoñ nlô e bita bi mbe e zañe ba besiñe bap.

Jephthé a nga ye’elane Yéhôva na a volô nye na a dañe besiñe bé e bita. Ane a nga ka’ale Yéhôva na, nge a dañe besiñe bé, é ve nye môt ôsu ya nda jé é zu tôbane nye, éyoñ é bulan. Môt ate é ke saé  nda Zambe ényiñe jé ése. Nda Zambe é nga be vôme bôte be mbe be kele kañe Yéhôva melu mvus. Nde Jephthé a nga dañe bita! Ye wo yeme môt ôsu a nga zu wubane nye éyoñ a nga kui nda jé?—

Ôwé, ngo Jephthé ébien! A mbe mone wuwua a mbe a bili, ve éyoñe ji a nga zu kandan a nye. Jamete é nga bo Jephthé angôndô ya mintaé nlem. Ve te vuane na a nga bo Yéhôva ngaka’a. Nde ngo jé é nga jô nye na: ‘Ésa wom, ô boya Yéhôva ngaka’a, bo’o ma aval ô nga jô.’

Ngo Jephthé fe é mbe é wô’ô nleme mintaé. Amu ésaé ya nda Zambe é mbe é tinane na, é wu te ke aluk, nge biaé bon. Ve jame da, a mbe a yi na, jôm ésa wé a nga ka’ale é boban, a na a ve Yéhôva nleme mvaé. Jamete é mbe mfi e mise mé a dañ aluk nge ke bon. Nde a nga kôlô nda ésa, a ke nyiñe nda Zambe, akekui a nga wu.

Ye wo buni na jam a nga bo é nga ve ésa ba Yéhôva nleme mvaé?— Ôwé! Nge wo nye’e Yéhôva a bo nye mewôk, wo fe wé funane ngo Jephthé. Wé ve éso ba nyua nleme mvaé, wé ve fe Yéhôva nleme mvaé.