Nakita ba nimo ang batang babaye sa larawan?— Siya ang anak ni Jepte. Ang Bibliya wala mag-ingon kon unsay iyang ngalan, apan nahibalo kita nga nalipay ang iyang amahan ug si Jehova sa iyang gihimo. Mokat-on kita bahin kaniya ug sa iyang amahan, si Jepte.

Si Jepte maoy maayong tawo. Siya migahin ug dakong panahon sa pagtudlo sa iyang anak bahin kang Jehova. Siya usab maoy isog nga tawo ug maayong lider. Busa gihangyo siya sa mga Israelinhon sa pagpanguna kanila sa pagpakiggubat sa ilang mga kaaway.

Si Jepte nangayog tabang sa Diyos aron modaog. Siya misaad nga kon siya makadaog, iyang ihatag kang Jehova ang unang tawo nga mogula sa iyang balay  inigpauli niya. Kining tawhana mopuyo ug magtrabaho sa tabernakulo sa Diyos sa tibuok niyang kinabuhi. Ang tabernakulo mao ang dapit diin ang mga tawo moadto aron sa pagsimba sa Diyos. Aw, nakadaog si Jepte! Nahibalo ka ba kon kinsay unang migula sa iyang balay pagpauli niya?—

Oo, ang anak ni Jepte! Bugtong siya nga anak, apan karon kinahanglang ipadala siya sa iyang amahan ngadto sa tabernakulo. Naguol niini si Jepte. Apan hinumdomi nga si Jepte nakasaad na. Dihadiha, ang iyang anak miingon, ‘Pa, misaad ka kang Jehova, busa kinahanglan nga imo kining tumanon.’

Naguol usab ang anak ni Jepte. Sa tabernakulo, dili siya puwedeng magminyo ug manganak. Apan gusto gayod niyang tumanon ang saad sa iyang amahan aron malipay si Jehova. Para niya, mas importante kini kay sa pagminyo o pagbaton ug mga anak. Busa siya milakaw ug mipuyo sa tabernakulo sa tibuok niyang kinabuhi.

Nalipay kaha ang iyang amahan ug si Jehova sa iyang gihimo?— Siyempre! Kon imong sundon ug higugmaon si Jehova, mahisama ka sa anak ni Jepte. Segurado nga malipay usab ang imong ginikanan ug si Jehova kanimo.