KALANSEN 4
A ye a facɛ ni Jehova dusu diya
Zɛfite y’a daa di Jehova ma koo juman lo la?
A tun man nɔgɔ, nka Zɛfite denmuso y’a facɛ ka dajuru dafa
Sungurunin min be jaa nin kan, i ɲɛɛ b’a la wa?— Zɛfite denmuso lo. Bibulu t’a tɔgɔ fɔ an ye, nka an b’a lɔn ko a y’a facɛ ni Jehova dusu diya. An k’a ɲini ka Zɛfite n’a denmuso lɔn.
Zɛfite tun ye mɔgɔ ɲuman ye ani a ye wagati caaman ta k’a denmuso kalan Jehova koo la. A tun ye cɛɛ barikaman ni kuntigi ɲuman ye fana. O le kama, Israɛldenw y’a ɲini a fɛ a k’u ɲɛminɛ ka u juguw kɛlɛ.
Zɛfite ye Ala deli ko a k’ale dɛmɛ ka see sɔrɔ a juguw kan. A ye dajuru ta ko n’a sera a juguw kɔrɔ, a kɔsegitɔ, mɔgɔ fɔlɔ min bena bɔ ale ka soo k’a kunbɛn, a bena o tigi di Jehova ma. O tigi bena taga to Ala ka fanibugu kɔnɔ ka baara kɛ o yɔrɔ la a sii bɛɛ la. O wagati la, Ala ka fanibugu tun ye Ala batoyɔrɔ lo ye. Ayiwa, Zɛfite sera a juguw kɔrɔ! A kɔsegitɔ, i b’a lɔn mɔgɔ fɔlɔ min bɔra a ka soo kɔnɔ k’a kunbɛn wa?—
Ayiwa, a denmuso lo! Ale lo tun ye a ka deen kelenpe ye. Nka, Zɛfite ka ɲi k’a bila ka taga Ala ka fanibugu la. O ye a dusu tiɲɛ kosɔbɛ. Nka i hakili to a la ko a tun y’a daa di Jehova ma. O yɔrɔnin kelen, a denmuso ko: ‘Baba, n’i ye i daa di Jehova ma, i ka o koo kɛ.’
Saan o saan, Zɛfite denmuso terimusow tun be to ka taga bɔ a ye
Zɛfite denmuso dusu tiɲɛna fana. Ala ka fanibugu la, a tun tɛna se ka furu ani ka deenw sɔrɔ. Nka, a tun b’a fɛ sɔbɛ la k’a facɛ ka dajuru dafa ani ka Jehova dusu diya. O tun kɔrɔtanin lo ale fɛ ka tɛmɛ furuko ni deenw sɔrɔli kan. O kama, a bɔra a facɛ ka soo ka taga to Ala ka fanibugu la a sii tɔɔ bɛɛ la.
E ka miiri la, a ye min kɛ, o ye a facɛ ni Jehova dusu diya wa?— Ɔnhɔn, o ye u dusu diya! Ni i be mɛnni kɛ ani i be Jehova kanu, e fana bena i wolobagaw ni Jehova dusu diya kosɔbɛ i ko Zɛfite denmuso.
