On yi’ii kun jiwun e oo fotoo ɗoo ? — Ko o ɓiɗɗo gorko innetenooɗo Yiftaaha. Deftere Allah nden wowlaali innde jiwun kun, kono hiɗen anndi o weltinno Yahuwah e baaben makko. Janngen fii makko e baaben makko, Yiftaaha.

Yiftaaha hari ko o gorko moƴƴuɗo. O jannayno jiwun makko kun fii Yahuwah. Hari ko o gorko dolnuɗo e hooreejo kelɗuɗo. Ko ɗun waɗi, banii Isra’iila’en wi’i mo yo o wonu hooreejo maɓɓe fii waɗugol gere e ayɓe maɓɓe ɓen.

Yiftaaha torii Allah fii yo ɓe foolu ayɓe maɓɓe ɓen. Yiftaaha waɗuno fodoore okkugol Yahuwah adotooɗo yaltude ka suudu makko fii jaɓɓagol mo si o foolii saa’i o arti. On aaden woni gorko maa debbo wonay golloowo ka suudu  rewirdu Allah. Suudu rewirdu ndun hari ko nokkuure ka yimɓe yahayno fii rewugol Allah e on saa’i ɗon. Yiftaaha fooluno ka gere. Hiɗon anndi hommbo adii yaltude fii jaɓɓagol mo ko o arti ka suudu makko ? —

Ko goonga, ko jiwo Yiftaaha on. Hari ko jiwo makko bajjo on. Jooni non Yiftaaha no haani naɓude jiwo makko on ka suudu rewirdu Allah. Ɗun welaano mo. Kono annditee, hari o waɗiino fodoore. Ko onsay jiwo makko on wi’i : « Baaba a fodduno Yahuwah, teddin ɗun. »

Jiwo Yiftaaha on kadi hari weltanooki. Ɓayri si mo gollude ka suudu rewirdu Allah, o jommbetaake o heɓataa ɓiɓɓe. Kono himo faalanoo tenddinde fodoore baaben makko nden e o weltina Yahuwah. Ko ɗun ɓurunoo hittude e makko ɗoo yo o jommbeede maa o hebude ɓiɓɓe. Ko ontuma o yahi ka suudu rewirdu, o woni ton e nder ngurndan makko ɗan fow.

Hiɗon sikkude ko o waɗunoo kon weltinno Yahuwah e baaben makko ? — Ko goonga, o weltinno ɓe. Si tawii hiɗon ɗofti e hiɗon yiɗi Yahuwah, on wa’ay wa jiwo Yiftaaha on. Onon kadi on waaway weltinde mawɓe mon ɓen e Yahuwah.