Ə́ kaa nɛɛnu lon ŋɛi kaai voto hu ? — Zefute lon nɛɛnu katii. Biblə hwa naa ɓo, kɛlɛɛ gu gɔlɔn guɔ ə nan da Zehova di kwəinɛɛ. Gu gbea Zefute da non nɛɛnu di maa mɛni kɔlɔn.

Zefute ə kɛ a hulɔnu yii ŋɔ mɛni lɛlɛɛ, ə kɛi lowai kɛnɛ həɠə ɉu yɛ Zehova maa mɛni kalan non ma. Ə kɛ nwɔnɔ a hulɔnu yii vaŋa kɛnɛ, ə lɛɛ yɛ ɓo a ɲɛi tɔwɔ mun nɛlɛɛ. Yili ɓa Isilayɛli lonnii di mo ma diɛ ma ə tɔɔ di ɲɛi tɔwɔ, ə gɛ da di yowoɠaa di kɔ kɔ.

Zefute ə Yálá hwɛli ə gɛ Yálá ə kpɔnmaa tɛɛ bɔ, gɔ ə nɛɛ ma. Ə mo Zehova ɓa yɛ ma ɲee a tɛɛ ɲowoɠaa diɛ, nui toloo pai kɛ kulɔi ɲəi bɛlɛn yɛ pa naakwiɛn ɉii ɓɛlowai a kɛi pənə yɛ pa la,  a maa nui tii tɛɛ kɛ bɔ. Maa nui tii ə li pa kɛi kóló kɛi Yálá ŋɔ tabɛlinaakilə mu ŋɔ yɛnɛɛ kəlee yee mu. Tabɛlinaakilə ə kɛ a kɛɛnaa yii nua di kɛi Yálá ɓatoo laa. Gɔi tii ə nɛɛ Zefute ɓa ! Ɓɛlowai ə kɛi pənə yɛ pa la, nui toloo pa naakwiɛn ɉii ə́ gɔlɔn ? —

Ee, Zefute lon nɛɛnu ɓə kɛ ! Yaa kɔu tɔnɔn lɔ ɓə kɛ nan ɲəi, maanɛɛ kea kɛ Zefute ə non dɛɛ. Zefute kɔlɔ ə haa ma kpɔ kɛnɛ yili hu. Kɛlɛɛ ə́ kiliŋahiɛ, Zefute ə mɛni ta ɓo Yálá ɓa. Ɲaa ɓa, non ə mo ma yɛ ma : « Nán, yii ə́ mo Zehova ɓa bɔ mɛni kɛ. »

Zefute lon nɛɛnu yaa kpɛli gɔlɔ ə haa ma. Hwa pɛli kɛ hilɛ həɠəi tabɛlinaakilə mu, ə lɛɛ ho lon gaa. Kɛlɛɛ, mɛnii nan ə mo Zehova ɓa, ə kɛ bɔ ə bɔ mɛni kɛ ə lɛɛ ə Zehova kwəinɛɛ. Yili hwialaɓoɔ kɛ ɲɛi ɓa, dɛɛ hilɛ həɠɛɛ da lon gaa diɛ. Yili maa mɛni ɓə gɛ yɛ həɠə di pɔɔli, yɛ li ŋɔ yɛnɛɛ kpəli kɛi tabɛlinaakilə mu.

Ə́ wɔ kili ɓa, yitii ə gɛ ə nan da Zehova di kwəinɛɛ ? — Ee, ə di kwəinɛɛ ! Ya lɛɛ nwoo mu laa kɛ, ə́ Zehova wɛlilakɛ, ya pɛli kɛi yɛ Zefute lon nɛɛnu. Yɛ́ kpɛli ya ə́ kaa nua kwəinɛɛ, ə lɛɛ ə́ Zehova kwəinɛɛ kpɔ kɛnɛ.