¿Piʼrüin tü jintutchon suluʼukat tü ayaakuaakat?... Tü joʼuukot, shia nüchon wanee wayuu kanüliakai Jefté. Nnojotsü süküjüin wamüin tü Wiwüliakat kasaichin sünülia. Shia süküjaka neʼe wamüin talatüin naaʼin chi süshikai otta Jeʼwaa sutuma tü saainjakat. Jooʼu wekirajaai süchiki shiaka otta nüchiki Jefté.

Jefté, nia wanee wayuu anamia otta nülatirüin wainma kaʼi sünain ekirajaa tü nüchonkat nüchiki Jeʼwaa. Nia wanee wayuu toolo aaʼinchi otta katchinshi maʼin. Nachuntaka na israeliitakana nümüin Jefté süpüla nekiipüʼüinjachin nia sünain atkawaa namaa na naʼünüükana.

Oʼuraajüshi Jefté nümüin Maleiwa süpüla achuntaa kaaliinwaa. Müshi Jefté nümüin Maleiwa: «Takanajüle na taʼünüükana putuma, tasülajeerü pümüin tü wayuu  ojuʼitakat palajana tepialuʼujee sünain apanapajaa taya». Wayuukot tia, aʼyataainjatü shia waneepia suluʼu tü aʼwaajüleekat Maleiwa otta nnojotsü ojuʼitüinjatüin shia. Sükanajuuka nutuma Jefté tü nüʼünüükalüirua. ¿Pütüjaa aaʼu jaralüin ojuʼitüin palajana nüpanapajee Jefté nüntapa nipialuʼumüin?...

Shia tü nüchonkat. Waneesüchon neʼe shia nümüin Jefté. Shiasaʼa jooluʼu nuluwataainjatüin shia wattamüin. ¡Mojusü maʼin naaʼin sutuma tia! Sotoka naaʼin Jefté tü nümakat paala nümüin Jeʼwaa. Sümakalaka tü nüchonkat: «Taataa, lotuitpa pünüiki nümüin Jeʼwaa, acheküsü paainjüinjatüin tü pümakat nümüin».

Mojusü maʼin saaʼin nüchon Jefté. Maʼwayuuseinjana otta machonniinjana na aʼyataakana nümüin Maleiwa suluʼu tü aʼwaajüleekat. Sücheküin nikeraajüin chi süshikai tü nümakat nümüin Jeʼwaa. Analeesia sümüin aʼyatawaa nümüin Maleiwa suulia kaʼwayuusee otta kachonwaa. Suʼunaka shipialuʼujee süpüla shiʼyataainjatüin waneepia nümüin Maleiwa suluʼu tü aʼwaajüleekat. Talatüsü maʼin naaʼin Jeʼwaa sutuma tü saaʼinrakat tü nüchonkat Jefté.

¿Talatüsüche naaʼin Jeʼwaa otta chi süshikai sutuma tü saainjakat?... Aa, talatüsü naaʼin. Poonoole nümaa Jeʼwaa otta aire püpüla nia maʼaka saaʼin tü nüchonkat Jefté, talateena putuma na kachonniikana pia otta müshia Jeʼwaa.