YEMBOE 4
Kuñatai omboyerovia tu jare Jehová
¿Mbae ñererökuaveepa oyapo oï Jefté Jehovápe?
Yëpetei yavai yae, Jefté tayɨ oyapo Jefté iñererökuavee
¿Kiapa jókuae kuñatai raɨ mojaangape oï vae?... Jaeko Jefté tayɨ. Bibliape mbaetɨ oime jee, ërei jae omboyerovia tu jare Jehová. ¿Reipotapa reikuaa Jefté jare tayɨre?
Jefté kuimbae ipɨakavi vae. Jae omboe avei tayɨ Jehováre. Jaenungavi kuimbae jëia vae, jare oikovi mburuvicharä, jáeramo Israel iñemuña reta oparandu: “¿Reipotapa reiko oreruvicha ñeraro pegua?”
Jefté oyerure Jehovápe omborɨ vaerä omoamɨri jovaicho reta ñerarope. Jefté oyapo ñererökuavee yandeYape omongana ñeraro yave omeeta mbota Jehovápe tenonde kia oë ovaiti jëtagüi vae ouye yave. ¿Mbaepa oipota jei kuae? Jókuae kia oë ovaiti vae oiko aveita jare oparavɨkɨta Tumpa peguarä tabernáculope opaete ara rupi oikove oiko ramboeve. Arakaete tabernáculo gente reta ojo omboete vaerä Jehová. ¿Omoamɨripa Jefté ñerarope? Omoamɨri. Oväe yave jëtape, ¿reikuaapa kiapa oë ovaiti tenonde?...
¡Tayɨ! Tayɨ jaevaeño vae, añave Jefté omaeñotako ojo oiko tabernáculope. Jókuae tuicha yae ombopɨatɨtɨ, ërei jae oyapo metei ñererökuavee Jehovápe, ¿nemaendúapa? Jáeramo tayɨ jei chupe: “Cheru, reyapo jókuae reñererökuavee yandeYape, eyapo jökorai”.
Año ñavo Jefté tayɨ iamiga reta opou pɨri
Jaenungavi Jefté tayɨ jeta ipɨatɨtɨ. Ojo oiko yave tabernáculope mbaetɨ ipuereta omenda jare mbaetɨvi ipuereta güɨnoi imembɨ. Ërei jae oipota oyapo tu iñererökuavee omboyerovia vaerä Jehová. Chupe guarä jókuaeko ikaviete omenda vaegüi ani güɨnoi imembɨ. Jáeramo oeya jëta oiko vaerä tabernáculope opaete oikove oiko ramboeve.
¿Mbaepa nde rere, oyeroviara tu jare Jehová kuñatai oyapo vaere?... ¡Jökorai ko! Ndepuerevi reyapo Jefté tayɨ rami. Reyapo Jehová jei vae jare reaɨu yave. Remboyeroviatako. Jaenungavi nderu jare ndesɨ oyeroviata.
YAMONGETA TUMPA IÑEEPE:
^ párr. 11 Tembikuatía hebreo ñeepe kuae ñee reta yandemboe Jefté tayɨ oiko avei tabernáculope opaete ara rupi oikove oiko ramboeve jare ngaraa omenda.
