ZASEŊƆ 4
A Yuun Basɛ Ti A Sɔ La Yehowa Puurɛ Pee
Yepta pu’useri ti a biŋe la bem nɔɔrɛ la Yehowa?
La yuun kpe’em mɛ, ge Yepta poyɔa wa yuun eŋɛ a sɔ n biŋe nɔɔrɛ se’em la
Ho nyɛ pugela la n boi foote la poan la?— A dela Yepta poyɔa. Baabule la ka pa’alɛ to a yu’urɛ ge to mi ti a yuun basɛ ti a sɔ la Yehowa puurɛ n pee. Basɛ ti to zamesɛ baŋɛ eŋa la a sɔ Yepta yele.
Yepta yuun dela nɛresoŋɔ ge me yuun dekɛ tɛm zo’e zo’e pa’ala a poyɔa Yehowa yɛla. A yuun dela mina n mi yɛla ge tara paŋa. Bala n sɔi ti Israeldoma yuun loe en ti a dɛna ba nɛŋadaana ti ba ta’an zabɛ la ba dinedoma.
Yepta yuun zusɛ Naayinɛ ti a soŋɛ en ti a zabɛ nyaŋɛ. Yepta yuun yele Yehowa ti a san soŋɛ en ti a zabɛ nyaŋɛ, mina n ze’ele a yire yese yia na tu’usɛ en ti a ze’ele zaberɛ la poan lebera na, a wan dekɛ en bo en. Nɛrekaŋa wan dekɛ a vom za’a tuna Naayinɛ pu’usegɔ deo la poan. Pu’usegɔ deo la yuun dela zɛ’an ti nɛreba kena pu’usa Naayinɛ tɛm woo. Tɔ, Yepta yuun zabɛ nyaŋɛ! Eŋa n yuun leberi yire na la, ho mi mina n yuun tu’usɛ en yia?—
Ɛɛ, Yepta poyɔa! Yepta bia za’a n bala, ti nananawa a wan dekɛ en bo. Wana wa yuun basɛ ti la daam en. Ge tɛra ti a yuun biŋe la nɔɔrɛ. Bala basɛ ti a poyɔa wa kɔ’ɔn yele en yeti, ‘N sɔ, ho biŋe la nɔɔrɛ la Yehowa, yi dekɛ mam tum hon yele se’em la.’
Yuunɛ woo poan, Yepta poyɔa wa zɔdoma yuun ni keŋɛ mɛ ta bisɛ en
La mi yuun daam Yepta poyɔa wa mɛ. Pu’usegɔ deo la poan, a yuun kan nyɛ yɔ’ɔ ele dɔɣɛ kɔma. Ge a yuun kɔ’ɔn bɔta la a eŋɛ a sɔ n biŋe nɔɔrɛ la se’em la ti Yehowa puurɛ pee. Bala n yuun de ninmɔ’ɔrɛ bɔ’ɔra en gana eŋa n wan ele bii dɔɣɛ kɔma. Dene zuo a yuun basɛ yire mɛ ge keŋɛ ta bɔna pu’usegɔ deo la poan a vom za’a waabi.
Hon ti’isɛ ti eŋa n yuun eŋɛ sɛla la basɛ ti a sɔ la Yehowa puurɛ pee mɛ?— Ɛɛ, ba puurɛ yuun pee ya! Hon me san nana ge nɔŋɛ Yehowa, ho wan ana wuu Yepta poyɔa wa. Ho me wan basɛ ti ho dɔɣereba la Yehowa puurɛ pee.
