Mo munu okakazona ngo motjiperendero?— Oko okanatje komurumendu wena Jefta. Ombeibela kai tu raere ena rako, posi yokutja matu tjiwa kutja ka yorokisa omutima waihe nowaJehova. Indjo tu ri honge ohunga na ko na ihe yako, Jefta.

Jefta wa ri omurumendu omuwa nu wa turapere oruveze rwokuhonga okakazona ke nga ohunga na Jehova. Eye wa ri omurumendu omunamasa nu wina wa ri omuhongore omuwa. Okutja Ovaisrael ve mu ningira kutja me ve hongorere motjirwa tjaave sokukarwa ku novanavita na wo.

Jefta wa ningira omasa ku Mukuru kutja ve taare otjirwa hi. Eye wa kwizika kutja tja taara ma yandja omundu omutenga ngwa piti mondjuwo ye indu tja yaruka konganda, ku Jehova. Omundu ngwi ma kakara  nokukaungura oure womuinyo we pondanda yaMukuru yomaturiro. Ondanda yomaturiro ya ri oruveze ovandu paave kerikotamena ku Mukuru. Okutja, Jefta wa taara otjirwa! Eye tja yaruka konganda, ove mo tjiwa kutja ouṋe ngwa pita omutenga mondjuwo?—

Ya ri omuatje we omukazona! Eye ongwa ri omuatje we erike, nu nambano Jefta aa sokumuhinda kokure. Otjiṋa hi tje mu hihamisa omutima tjinene. Posi yokutja, zemburuka kutja eye wa tjita omakwizikiro. Okutja omukazona we wa tja ku ye: ‘Tate, ove wa tjita omakwizikiro ku Jehova, okutja u sokuyeṱakamisa.’

Omuatje waJefta wina wa hihamwa omutima tjinene. Pondanda yomaturiro eye katja yenena okukupwa nokuhara ovanatje. Posi yokutja aa vanga okuyenenisa omakwizikiro waihe nokuyorokisa omutima waJehova. Otjiṋa hi tja ri otjinanḓengu ku ye moruveze rwokukupwa nokuhara ovanatje. Okutja otja tjinda poyawo nu a kakara pondanda yomaturiro oure womuinyo we.

Mo kambura kutja otjiṋa tja tjita hi, tja nyandisa omutima waihe nowaJehova po?— Ii, tja nyandisa omitima vyawo! Tji u nonḓuviro nu osuvere Jehova, ove mo kara tjimuna omuatje waJefta omukazona. Ove wina mo yorokisa omutima wovanene voye nowaJehova.