Twalaḍ taqcict-​agi tamecṭuḥt di ţţeswiṛa?— Aţţan akk-​d baba-​s. Baba-​s isem-​is Iftaḥ. Adlis Iqedsen ur d-​yenni ara isem-​is teqcict-​agi, meεna neẓra belli tessefṛeḥ baba-​s akk-​d Yahwa. Eyya-​d a nẓer anta-​ţ w’a nẓer menhu i d baba-​s.

Iftaḥ yella d argaz n lεali; iheddeṛ-​as aṭas i yelli-​s ɣef Yahwa. Yella daɣen d argaz iǧehden yerna d win iḥekkmen akken ilaq. Yiwen wass, At Isṛayil ḍelben-​as ad yili d lḥakem fell-​asen deg yiwet n lgirra ara xedmen akk-​d yeεdawen-​nsen.

Iftaḥ yeẓẓull i Yahwa bac a t-​iεiwen ad yerbeḥ lgirra-​yagi. Yenna-​yas: “A Yahwa, ma yella rebḥeɣ, win ara d-​iffɣen d amezwaru seg wexxam-​iw m’ara  d-​awḍeɣ, a k-​t-​fkeɣ.” Lmeεna-​s, wagi ara d-​iffɣen ad iqqim ṭṭul n leεmeṛ-​is deg uqiḍun imqeddes n Ṛebbi w’ad yexdem dinna. Aqiḍun imqeddes d amkan anda i ţṛuḥun medden akken ad εebden Ṛebbi. Kra n lweqt umbeεd, Iftaḥ yerbeḥ lgirra! Teẓriḍ anwa i d-​yeffɣen d amezwaru mi gewweḍ s axxam-​is?—

D yelli-​s! Uyerna, d neţţat kan i gesεa. Tura, ilaq a s-​yini aţ-​ţṛuḥ. Annect-​a yesseḥzen-​it mliḥ. Lameεna, mmekti-​d belli yewεed-​as i Ṛebbi; ihi ilaq ad yexdem ayen i s-​yenna. Imiren kan, tenna-​yas yelli-​s: “A baba, tefkiḍ lweεd i Yahwa. Tura ilaq aţ-​ţeṭṭfeḍ deg wawal-​ik.”

Ula d yelli-​s n Iftaḥ teḥzen. Deg uqiḍun imqeddes, ur tezmir aţ-​ţezweǧ ur tezmir aţ-​ţesεu dderya. Γas akken, tebɣa seg wul-​is aţ-​ţqader lweεd-​nni n baba-​s w’aţ-​ţessefṛeḥ Yahwa. Ar ɣur-​es, axiṛ-​as ayagi wala aţ-​ţezweǧ neɣ aţ-​ţesεu dderya. Tṛuḥ ihi seg wexxam n baba-​s iwakken aţ-​ţezdeɣ deg uqiḍun imqeddes ṭṭul n leεmeṛ-​is.

Iban-​ak-​d belli tessefṛeḥ baba-​s akk-​d Yahwa?— D ṣṣeḥ, tessefṛeḥ-​iten mliḥ! Ma yella teţţaɣeḍ awal yerna tḥemmleḍ Yahwa, aţ-​ţiliḍ am yelli-​s n Iftaḥ. Aţ-​ţessefṛḥeḍ baba-​k d yemma-​k w’aţ-​ţessefṛḥeḍ Yahwa.