Nĩ ũrona kairĩtu gaka karĩ mbica-inĩ?— Nĩ ka mũthuri wetagwo Jefitha. Bibilia ndĩtwĩraga rĩĩtwa rĩako, no nĩ tũĩ atĩ nĩ gaakenirie ithe, na gagĩkenia Jehova. Ta reke twĩrute ũhoro wako, na wa ithe, Jefitha.

Jefitha aarĩ mũndũ mwega na nĩ aahũthagĩra mahinda maingĩ gũthomithia kairĩtu gake ũhoro wĩgiĩ Jehova. Ningĩ aarĩ mũndũ wĩna hinya na mũtongoria mwega. Nĩ ũndũ ũcio Aisiraeli makĩmũũria amatongorie mbaara-inĩ makĩrũa na thũ ciao.

Jefitha akĩhoya Ngai ũteithio nĩguo ahootane. Akĩĩrĩra Jehova atĩ angĩahootanire, nĩ angĩamũheire mũndũ wa mbere ũrĩa ũngĩoimire gwake amũtũnge  agĩcoka mũciĩ. Mũndũ ũcio angĩatũũrire thĩinĩ wa hekarũ ya Ngai ũtũũro wake wothe na arutage wĩra kũu. Hekarũ yarĩ nyũmba ĩrĩa andũ maathiaga kũhoera Ngai hĩndĩ ĩyo. Jefitha nĩ aahootanire mbaara-inĩ ĩyo! Nĩ ũĩ nũũ woimire gwake arĩ wa mbere gũthiĩ kũmũtũnga?—

Nĩ mũirĩtu wake! Jefitha ndaarĩ na mwana ũngĩ, na rĩu no mũhaka angĩaheanire mũirĩtu ũcio wake. Ũndũ ũcio nĩ wamũiguithirie ũũru mũno. No ririkana atĩ nĩ eerĩire Ngai. O hĩndĩ ĩyo, mũirĩtu wake akĩmwĩra: ‘Baba, nĩ werĩire Jehova, na kwoguo no mũhaka ũhingie ũndũ ũcio.’

Mũirĩtu ũcio wa Jefitha o nake nĩ aaiguire ũũru. Arĩ kũu hekarũ-inĩ, ndangĩahikire nĩguo agĩe na twana. No nĩ eendaga mũno kũhingia kĩĩranĩro gĩa ithe na gũkenia Jehova. Ũcio nĩguo warĩ ũndũ wa bata harĩ we gũkĩra kũhika na kũgĩa na ciana. Kwoguo akiuma mũciĩ na agĩikara hekarũ-inĩ ũtũũro wake wothe.

Hihi nĩ ũrona ta ũndũ ũcio eekire wakenirie ithe na ũgĩkenia Jehova?— Ĩĩ, nĩ wamakenirie! O nawe ũngĩkorũo ũrĩ mwathĩki na wende Jehova, no ũtuĩke o ta mũirĩtu wa Jefitha. Na nĩ ũrĩkenagia aciari aku mũno na ũgakenia Jehova.