OQALUTTUAQ 4
Jeftap paniata ataatani Jehovalu nuannaartippai
Jefta Jehovamut qanoq neriorsuiva?
Sapernaraluartoq Jeftap pania ataatami neriorsuineratut iliorpoq
Niviarsiaraq assilissami takusinnaaviuk? — Taassuma ataataa Jeftamik ateqarpoq. Niviarsiararli qanoq ateqarnersoq Biibilimi eqqaaneqanngilaq. Nalunngilarpulli taassuma ataatani aamma Jehova nuannaartikkai. Niviarsiaraq taanna ataataalu, Jefta, pillugit paasisaqariarta.
Jefta angutaavoq ajunngitsoq. Jehova pillugu ilinniartitsilluni panini piffissaqarfigilluartarpaa. Jefta nukittuullunilu inunnik siulersuillaqqissuuvoq. Taamaattumik Israelikkut akeqqaminnut sorsuttussaanerminni Jefta siulersueqquaat.
Ajugaasinnaaqqullutik Jefta Guutimut ikioqqulluni qinuvoq. Jefta neriorsuivoq sorsunnermi ajugaassaguni angerlaruni illuminit inuk siulliulluni anisoq Jehovamut tunniukkumallugu. Inuk taanna inuunini tamaat tupermi naapeqatigiittarfimmi najugaqassallunilu
sulisussaavoq. Taamani tupeq naapeqatigiittarfik tassaavoq inuit Jehovamik pallorfiginnittarfiat. Kikkummi sorsunnermi ajugaappat? Jefta sakkutuuilu sorsunnermi ajugaapput. Jefta angerlarmat siulliulluni illuaniit anisoq kinaavamita? —Aap, tassaavoq Jeftap pania, qitornatuaa! Maannalu Jeftap panini tupermut naapeqatigiittarfimmut aallartittariaqarpaa. Tamannalu aliasuutigingaarpaa. Eqqaamajulli Jefta neriorsuisimasoq. Pania ingerlaannaq oqarpoq: ‘Ataata, Jehovamut neriorsuigavit neriorsuutit eqqortittariaqarpat.’
Ukiut tamaasa Jeftap pania ikinngutiminit pulaarneqartarpoq
Jeftap pania aamma aliasuppoq. Tupermi naapeqatigiittarfimmi inuussaguni katissinnaananilu meerartaarsinnaanngilaq. Kisianni ataatami neriorsuutaa malillugu iliorusullunilu Jehova nuannaartikkusuppaa. Tamanna katinnermit meerartaarnermillu pingaartinneruaa. Taamaattumik angerlarsimaffini qimappaa tupermi naapeqatigiittarfimmi inuunini naallugu najugaqarniarluni.
Taamaaliornera ataataata Jehovallu nuannaarutigaat? Qanoq isumaqarpit? — Aap, nuannaarutigingaarpaat! Naalakkuit Jehovalu asagukku Jeftap pania assigisinnaavat. Taamaalioruit illittaaq angajoqqaatit Jehovalu nuannaartissavatit.
BIIBILINNI UKU ATUAKKIT:
-
5 Mosesi 6:4-6
-
Eqqartuussisut 11:30-36