មេរៀនទី៤
នាងបានធ្វើឲ្យឪពុកនិងព្រះយេហូវ៉ាមានចិត្ដរីករាយ
តើយែបថាកំពុងសន្យាអ្វីជាមួយនឹងព្រះយេហូវ៉ា?
ទោះជាពិបាកក្ដី កូនស្រីយែបថាបានធ្វើតាមអ្វីដែលឪពុកនាងសន្យា
តើកូនឃើញក្មេងស្រីក្នុងរូបភាពនេះទេ?— នាងជាកូនស្រីរបស់បុរសម្នាក់ឈ្មោះយែបថា។ គម្ពីរមិនបានប្រាប់ឈ្មោះរបស់នាងទេ ប៉ុន្ដែយើងដឹងថានាងបានធ្វើឲ្យឪពុករបស់នាង និងព្រះយេហូវ៉ាមានចិត្ដរីករាយ។ សូមឲ្យយើងរៀនអំពីនាងនិងអំពីយែបថាដែលជាឪពុករបស់នាង។
យែបថាជាបុរសល្អម្នាក់ ហើយគាត់បានចំណាយពេលយ៉ាងច្រើនដើម្បីបង្រៀនកូនស្រីរបស់គាត់អំពីព្រះយេហូវ៉ា។ គាត់ក៏ជាបុរសក្លាហាននិងជាអ្នកដឹកនាំដ៏ល្អដែរ។ ដូច្នេះបណ្ដាជនអ៊ីស្រាអែលបានសុំគាត់ឲ្យនាំមុខពួកគេដើម្បីទៅច្បាំងនឹងសត្រូវ។
យែបថាបានអធិដ្ឋានសុំព្រះយេហូវ៉ាជួយគាត់ឲ្យឈ្នះ។ យែបថាបានសន្យាថា បើគាត់ឈ្នះ គាត់នឹងឲ្យព្រះយេហូវ៉ានូវមនុស្សដំបូងដែលចេញពីផ្ទះរបស់គាត់ពេលគាត់ត្រឡប់មកវិញ។ មនុស្សនេះនឹងរស់នៅហើយធ្វើការនៅ
កន្លែងត្រសាលជំនុំរបស់ព្រះអស់មួយជីវិត។ នៅសម័យមុន ត្រសាលជំនុំគឺជាកន្លែងដែលប្រជាជនទៅគោរពប្រណិប័តន៍ព្រះ។ នៅទីបំផុត យែបថាបានឈ្នះក្នុងចម្បាំងនោះមែន! ពេលគាត់ត្រឡប់មកវិញ តើអ្នកណាបានចេញពីផ្ទះរបស់គាត់មុនគេ? តើកូនដឹងទេ?—មែនហើយ គឺកូនស្រីរបស់គាត់! យែបថាមានកូនតែម្នាក់គត់ ហើយឥឡូវគាត់ត្រូវបញ្ជូននាងទៅរស់នៅឆ្ងាយពីផ្ទះ។ នេះធ្វើឲ្យគាត់ពិបាកចិត្ដណាស់។ ប៉ុន្ដែសូមចាំថា គាត់បានសន្យារួចហើយ។ ភ្លាមៗនោះ កូនស្រីរបស់គាត់បាននិយាយថា៖ ‹បើលោកឪពុកបានសន្យាជាមួយនឹងព្រះយេហូវ៉ាហើយ សូមធ្វើតាមសន្យានោះចុះ›។
ជារៀងរាល់ឆ្នាំ មិត្ដភក្ដិរបស់កូនស្រីយែបថាបានទៅលេងនាង
កូនស្រីយែបថាក៏ពិបាកចិត្ដដែរ ពីព្រោះនៅកន្លែងត្រសាលជំនុំ នាងមិនអាចរៀបការនិងមានកូនទេ។ ប៉ុន្ដែនាងចង់បំពេញតាមសេចក្ដីសន្យារបស់ឪពុកនាងយ៉ាងខ្លាំង ហើយនាងចង់ធ្វើឲ្យព្រះយេហូវ៉ាមានចិត្ដរីករាយ។ នេះជាអ្វីដែលសំខាន់ជាងការរៀបការនិងមានកូន។ ដូច្នេះ នាងបានចាកចេញពីផ្ទះ ហើយទៅរស់នៅកន្លែងត្រសាលជំនុំអស់មួយជីវិត។
តើកូនគិតថា ការប្រព្រឹត្ដរបស់នាងបានធ្វើឲ្យឪពុកនិងព្រះយេហូវ៉ាមានចិត្ដរីករាយឬទេ?— ប្រាកដជាដូច្នេះមែន! បើកូនស្តាប់បង្គាប់និងស្រឡាញ់ព្រះយេហូវ៉ា កូនក៏អាចដូចជាកូនស្រីយែបថាដែរ។ កូនអាចធ្វើឲ្យឪពុកម្ដាយនិងព្រះយេហូវ៉ាមានចិត្ដរីករាយណាស់។
សូមអានពីគម្ពីរ
^ វគ្គ 11 ក្នុងសំណេរភាសាហេប្រឺដែលជាភាសាដើម បទគម្ពីរនេះបានបញ្ជាក់ថាកូនស្រីយែបថាត្រូវរស់នៅកន្លែងត្រសាលជំនុំអស់មួយជីវិត ហើយនាងនឹងមិនរៀបការឡើយ។