Тӧ кәчʹьке ль сәр шькьл дьвини?~ Әԝ ԛиза мерәки йә, наве кʹижани кӧ Йәфтаһ ә. Кʹьтеба Пироз набежә дәрһәԛа наве ве кәчʹьке, ле әм заньн кӧ әԝе, дьле баве хԝә у Йаһоԝа ша кьр. Ԝәре әм дәрһәԛа ԝе у баве ԝе Йәфтаһ, пебьһʹәсьн.

Йәфтаһ мерәки баш бу у гәләк ԝәʹдә тʹәви ԛиза хԝә дәрбаз дькьр, сәва кӧ дәрһәԛа Йаһоԝа ԝе һин кә. Йәфтаһ ӧса жи мерәки ԛәԝи у сәркʹарәки баш бу. Ләма жи Исрайели хԝәстьн, ԝәки әԝ рʹебәрийа ԝан бькә сәва кӧ тʹәви дьжмьна шәрʹ бькьн.

Йәфтаһ Йаһоԝарʹа дӧа кьр сәва кӧ әԝ али ԝи бькә, ԝәки шәрʹда алт кә. Йәфтаһ соз дабу Йаһоԝа, кӧ һәрге әԝ дь ви шәрʹида алт кә, һьнге чахе әԝ вәгәрʹә мал, ԝе ԝи мәрьви пʹешкʹеши Хԝәде бькә, йе кӧ пешийа һʹәмуйа жь мала  ԝи дәркʹәвә у рʹасти ԝи бе. Әԝ мәрьве кӧ пʹешкʹеши Йаһоԝа дькьрьн, гәрәке тʹәмамийа әʹмьре хԝә дь коне Хԝәдеда дәрбаз кьра у бьжита. Кон әԝ щи бу, кʹидәре кӧ ԝәʹде бәре мәрьв Хԝәдерʹа ԛӧльх дькьрьн. Ахьрийе Йәфтаһ дь шәрʹда алт кьр! Ле тӧ зани чахе Йәфтаһ жь шәрʹ вәгәрʹийа мал, кʹи пешийа һʹәмуйа жь мала ԝи дәркʹәт у рʹасти ԝи һат?~

Бәле, әв ԛиза Йәфтаһ бу! Әԝ зарʹа ԝийә тайе-тʹәне бу. У бьдә һʹәсабе хԝә кӧ Йәфтаһрʹа ньһа чьԛас чәтьн бу, ԝәки жь ԛиза хԝә бьԛәтә. Жь бо ве йәке әԝ гәләк дьлтәнг бу. Ле те бира тә, ԝәки әԝи ида соз дабу. Һьнге ԛиза ԝи готе: ‹Баво, һәрге тә соз дайә Йаһоԝа, бьра ӧса бә›.

Дь конда, ԛиза Йәфтаһ гәрәке мер нәкьра у зарʹ нәанийа, ләма жь бо ве йәке әԝ жи дьлтәнг бу. Ле әԝе гәләк дьхԝәст созе баве хԝә бинә сери, у дьле Йаһоԝа ша кә. Әв йәк сәва ԝе һе фәрз бу, нә кӧ ԝәки мер кә у зарʹа бинә. Ләма жи әԝе мала хԝә һишт, у тʹәмамийа әʹмьре хԝә дь конда дьжит.

Ча тӧ дьшьрмиш дьби, чахе ԛиза Йәфтаһ сафи кьр ӧса бькә, баве ԝе у Йаһоԝа ша бун?~ Бәле, әԝана ша бун. Һәрге тӧ гӧһдар и у Йаһоԝа һʹьз дьки, тӧ дькари мина ԛиза Йәфтаһ би. Тӧйе жи бькарьби дьле де-баве хԝә у Йаһоԝа, гәләк ша ки.