Yu de si di pikin we de na di pikchɔ?— Na wan man we nem Jɛfta in pikin. Di Baybul nɔ sho wi in nem, bɔt wi no se i bin mek in papa ɛn Jiova gladi. Lɛ wi tɔk smɔl bɔt in, ɛn in papa we na Jɛfta.

Jɛfta na bin gud man, ɛn i bin de tich in pikin bɔt Jiova ɔltɛm. I bin gɛt trɛnk ɛn na bin gud edman. So di Izrɛlayt dɛn bin aks am fɔ mek i bi dɛn edman we dɛn de go fɛt dɛn ɛnimi dɛn.

Jɛfta bin pre fɔ mek Gɔd ɛp am fɔ win di ɛnimi dɛn. I bin prɔmis Jiova se if i win, we i tɔn bak, i go gi Jiova di fɔs pɔsin we go kɔmɔt na in os fɔ kam mit am. Di pɔsin go go de ɛn wok na Gɔd in  Os te i day. Jɛfta bin win di fɛt! Yu no udat na di fɔs pɔsin we go mit am we i tɔn bak na in os?—

Na bin in gyal pikin. Na in na bin in wangren pikin. Ɛn naw, na in Jɛfta gɛt fɔ sɛn na Gɔd in Os. Dat bin mek Jɛfta in at pwɛl bad. Bɔt mɛmba se, i bin dɔn prɔmis Jiova. Wantɛm wantɛm, in pikin tɛl am se: ‘Papa, yu bin dɔn prɔmis Jiova, so yu gɛt fɔ du wetin yu bin dɔn prɔmis.’

Jɛfta in pikin sɛf nɔ bin gladi. We i de go de na Gɔd in Os, i nɔ gɛt fɔ mared, ɛn i nɔ gɛt fɔ bɔn pikin. Bɔt i bin rili want fɔ du wetin in papa bin dɔn prɔmis Jiova ɛn i bin want mek Jiova gladi. Dat bin impɔtant to am pas fɔ mared ɛn bɔn pikin. So i bin kɔmɔt na in papa in os ɛn go de na Gɔd in Os te i day.

Yu tink se wetin i bin du mek in papa ɛn Jiova gladi?— Yɛs, i bin mek dɛn gladi pasmak! If yu lɛk Jiova ɛn obe am, yu go tan lɛk Jɛfta in pikin. Yusɛf go mek yu mama ɛn yu papa ɛn Jiova, rili gladi.